Ana tilin bilmegen Ý.Qaısarov el basqarǵysy keledi - Lıngvıstıkalyq komıssııa qorytyndysy

ASTANA. QazAqparat - Búgin QR Ortalyq saılaý komıssııasynda Qazaqstan Respýblıkasynyń prezıdenttigine úmitker Ýálıhan Qaısarov memlekettik tildi meńgerý deńgeıin anyqtaý jónindegi lıngvıstıkalyq komıssııa synynan súrindi.

«Ýálıhan Ábishuly synaq barysynda «Táýelsiz memleketterdiń dostastyǵy: tarıhy men búgini» atty taqyrypta shyǵarma jazdy. Meniń tańqalyp otyrǵanym, Ýálıhan Ábishuly taqyrypty túsinbedi. Ol óz shyǵarmasynda Reseıge bodandyq, Qazaqstannyń Qytaımen tatý qarym-qatynasymyz týraly jazǵan. Úmitker shyǵarmada 23 qate jiberdi. Atap aıtsaq, tynys belgisinen -11, emileden - 5, stılıstıkalyq 7 qate kezdesti. Elimizdiń prezıdenti eń saýatty adam bolýy tıis», - dedi M.Joldasbekov.

«Siz ekinshi kezeńde І.Esenberlınniń «Almas qylyshyn» oqydyńyz. Biraq men bir suraq qoıyp edim, siz ózińiz oqyǵan mátinde ne aıtylǵanyn túsinbedińiz. Mátin ishinde jazýshy qoldanǵan birqatar qazaqtyń baıyrǵy ádemi sózderi bar. Jylyshyraı, tartý-taralǵy, qyrǵı-qabaq, soıylyn soǵý degen sııaqty sózderdi surap edim, maǵynasyn túsindirip aıta almadyńyz», - dep jalǵady sózin komıssııa tóraǵasy.

Onyń atap ótýinshe, úmitker úshinshi kezeńde ózi aınalysyp júrgen Kenesary han tóńireginde sóz qozǵaýy tıis bolǵan. Biraq ol Táshenov jaıynda, Jeltoqsan oqıǵasy týraly jáne qyzmet etip júrgen kezindegi qıyndyqtar jaıynda áńgime aıtqan.

«Biraq, bizdiń komıssııa músheleriniń tań qalǵany, ózińiz qolyńyzben Ortalyq saılaý komıssııasyna jazǵan ótinishińizde basqa memlekettiń azamattyǵynda turmyn dep jazypsyz. Búgin OSK bul týraly málimdeme jasady. Ózińizdiń qolyńyzben jazylǵan ómirbaıandyq derekte óte dóreki qatelikter jibergensiz. Qazaqstan Respýblıkasynyń aýmaǵynda «tuǵannan turamyn» dep jaýap beresiz. Sońynda toltyrǵan kúnińizdi jazypsyz. Naýryz sózine «naýyryz» dep qate jazasyz. Komıssııanyń qorytyndysy Qaısarov Ýálıhan Ábishuly zań talap etip otyrǵandaı qazaq tilin jan-jaqty erkin meńgermegen», - dedi M.Joldasbekov.