Ana sútimen emizý álemde 820 myń balanyń ómirin qutqarady
ASTANA. QazAqparat – Jyl saıyn tamyzdyń birinshi aptasynda Dúnıejúzilik omyraý sútimen emizý aptalyǵy atap ótiledi, dep habarlaıdy QazAqparat Densaýlyq saqtaý mınıstrligine silteme jasap.
1990 jyldan bastap 1-7 tamyz aralyǵynda álemniń 170 memleketi ana sútimen qorektendirý, emizý aptalyǵyn ótkizip keledi. Bala quqyqtary týraly Konventsııaǵa sáıkes, ár náreste jáne basqa jas toptary durys tamaqtanýǵa quqyly.
«Emizý – balanyń densaýlyǵy men ómir súrýin qamtamasyz etýdiń eń tıimdi ádisteriniń biri. Omyraý súti – náresteler úshin tamasha taǵam. Ol qaýipsiz, zııansyz jáne kóptegen aýrýlardan qorǵaýǵa kómektesetin antıdenelerden turady. Ana sútin emgen sábıler ıntellektýaldy túrde jaqsy damıdy, artyq salmaqtan az zardap shegedi jáne qant dıabetine beıim bolmaıdy. Emizetin áıelderde sút bezi men analyq bez qaterli isigi qaýpi de tómendeıdi», - dep jazylǵan mınıstrlik habarlamasynda.
Nárestelerdi týǵannan 23 aıǵa deıin emizý jyl saıyn búkil álem boıynsha 820 myń balany qutqarýǵa múmkindik beredi.
«Bizdiń elimizde de ana sútimen emizýge úlken mán beriledi. Emizý – ananyń balamen emotsıonaldy baılanysyn kúsheıtetin, balanyń psıhofızıkalyq damýyna jalpy qolaıly damýdy qamtamasyz etetin mańyzdy protsesterdiń biri. Bolashaq analardy omyraý sútimen emizýge daıyndaý áıeldiń júktilik kezeńinde onyń denesiniń fızıologııalyq ózgeristerin, balany keýdege salý tásilderin jáne tamaqtandyrýdyń jalpy erejelerin túsindirýden bastalady.
Qazirgi ýaqytta elimizde tek omyraý sútimen – 0-den 6 aıǵa deıingi 180 myń bala jáne 2 jasqa deıingi 568 myń bala (qosymsha tamaqtandyrýmen jáne jalpy tamaqtanýmen birge) omyraý sútimen qorektenedi», - deıdi Densaýlyq saqtaý mınıstrligi.
