Ana retinde ólim jazasyn qoldaımyn - Darıǵa Nazarbaeva
ASTANA. QazAqparat - QR Parlamenti Senatynyń depýtaty Darıǵa Nazarbaeva el arasynda pedofılderge ólim jazasyn taǵaıyndaý týraly usynystarǵa pikir bildirdi.
«Ana retinde men ony qoldaımyn. Biraq xalyqaralyq konventsııa bar, oǵan bara almaıtyn shyǵarmyz. Al endi ómirbaqı túrmege otyrǵyzýǵa, ondaı bizde quqyǵymyz bar», - dedi ol tilshilerge bergen suxbatynda.
Onyń aıtýynsha, pedofılderdi qoǵam bolyp, el bolyp, balalarǵa jolatpaýdy qolǵa alý qajet.
«Úkimet azamattarǵa degen memlekettik korporatsııa bar. Sonyń quramynda sondaı jumystardy bastaǵanbyz. Eń aldymen pedofıl qylmyskerlerdi tizimge alyp, baqylaý, túrmeden shyqqannan keıin qaıda ornalasty, qaı jerde jumys istep júr, olardy balalarǵa jaqyndatpaýǵa birtalaı jumystardy atqarýy tıis dep ol jumystardy qostyq. Árıne qoǵam olardy qadaǵalap otyrýy tıis. Mektepterge, balabaqshalarǵa jolatpaý kerek», - dedi ol.
Sonymen qatar, D. Nazarbaeva 6 jasar aqtaýlyq qyzdyń psıxıkalyq aýrýǵa shaldyqqan er kisiniń zorlaý faktisine qatysty da óz pikirin qosty.
«Ondaı adamdar aýrý dep sanalady. Olardy emdeý úshin birtalaı qarjy bólinedi. Olarǵa psıxotropty dári-dármekterdi berip otyr. Aýrý dep sanalsa, olardy emdeý de kerek. Endi saý adamnyń basyna ondaı oı kelmeıdi ǵoı. Ondaı jańalyqtardy biz úlken qorqynyshpen qabyldaımyz. Týǵan-týystarymen birge qaıǵyramyz», - dep atap ótti ol.
