«Ana – ómir shýaǵy» áıel-analarmen kezdesý ótti
Qyzylorda oblysy ákiminiń baspasóz qyzmetiniń habarlaýynsha, quttyqtaý sózinde aımaq basshysy qoǵamdaǵy áıel adamnyń joǵary ról atqaratynyn atap ótti.
«Barsha qazaqtyń ortaq maqtanyshy, sulýlyq pen erliktiń sımvolyna aınalǵan Tumar hanym, Aqjúnis, Qyz Jibektiń, el basyna is túsken qıyn kezeńderde basyn oqqa baılaǵan Álııa, Mánshúk, Hıýaz ult batyrlarynyń esimderi tarıh tórinde altyn áriptermen jazylyp qaldy. Nesibesin jerden kórip, eren eńbektiń úlgisin kórsetken jerlesterimiz Sálıma Jumabekova, Shyrynkúl Qazanbaeva, Ulbala Altaıbaeva, Jadyra Taspambetova sekildi apalarymyz ben ult rýhanııatyn, mádenıetin, ónerin asqaqtatqan Roza Baǵlanova, Sábıra Maıqanova, Mádına Eralıeva syndy maıtalman tulǵalarymyzdyń Syrdyń shejireli tarıhyndaǵy orny erekshe. Aımaqtyń damýyna erekshe atsalysqan jandardyń, onyń ishinde áıel-analarymyzdyń qalaı qurmettesek te jarasady», - dedi N.Nálibaev.
Aıta keteıik, kúni keshe oblys ákimi mereke qarsańynda ulaǵatty ustaz, Qyzylorda oblysynyń qurmetti azamaty Alma Aqdáýletovany halyqaralyq áıelder kúnimen jáne mereıli 90 jas mereıtoıymen quttyqtady jáne «Ana men bala» ortalyǵyndaǵy jańa bosanǵan analardy, aq halatty abzal jandardy merekemen quttyqtap, ystyq yqylasyn bildirdi.
Jıynda «Altyn alqa» ordeniniń ıegeri, tyl ardageri, 10 bala tárbıelep, 28 nemere, 26 shóbereniń qyzyǵyn kórip otyrǵan ana Rash Iskakova jerlesterin quttyqtap, izgi tilegin bildirdi.
Qyzylorda oblysynyń qurmetti azamaty, «Parasat», «Qurmet» ordeniniń ıegeri Almagúl Bojanova óz pikirin bildirse, «Serper» jastar syılyǵynyń ıegeri Aıtjanova Qarlyǵash Ana týraly monolog oqydy.
Kezdesý sońynda Nurlybek Mashbekuly Qazaqstan Respýblıkasynyń Prezıdenti Qasym-Jomart Kemeluly Toqaevtyń Jarlyǵymen «Altyn alqa» alǵan analarǵa marapattaryn tabystady.
