Ana ólimi, onkologııa jáne vaktsınatsııa: mınıstr óńir dárigerlerine mindet júktedi
ASTANA. KAZINFORM — Densaýlyq saqtaý mınıstri Aqmaral Álnazarova jumys sapary sheńberinde Jambyl oblysyndaǵy birqatar medıtsınalyq nysandardyń jumysymen tanysyp, óńirdiń medıtsına qaýymdastyǵymen keńes ótkizdi. Bul týraly vedomstvonyń baspasóz qyzmeti málim etti.
Mınıstr aldymen medıtsınalyq buıymdar shyǵaratyn «Amır ı D» JShS kásipornyna baryp, óndiristik qýattarymen jáne ónim assortımentimen tanysty.
Odan keıin mınıstr «Kardıohırýrgııa jáne transplantologııa ǵylymı-klınıkalyq ortalyǵy» JShS-na baryp, beıindi bólimshelerdiń jumysyn, dıagnostıka men emdeýdiń zamanaýı tehnologııalaryn, sondaı-aq joǵary tehnologııalyq medıtsınalyq kómekti jáne transplantologııany damytý máselelerin qarastyrdy.
Jumys saparynyń alǵashqy kúnindegi negizgi is-shara Jambyl oblysynyń medıtsına qaýymdastyǵymen ótken keńes boldy, onda medıtsınalyq kómektiń sapasy men qoljetimdiligi, kadrmen qamtamasyz etý, sanıtarııalyq-epıdemıologııalyq jaǵdaı, dári-dármekpen qamtamasyz etý, onkologııalyq qyzmetti damytý, tsıfrlandyrý jáne MÁMS júıesiniń jumys isteýi máseleleri qaraldy.
Keńesti asha otyryp, Aqmaral Álnazarova densaýlyq saqtaý ınfraqurylymyn damytý memlekettik saıasattyń basym baǵyttarynyń biri ekenin atap ótti.
— Sońǵy úsh jyldyń ishinde Qazaqstanda 813 densaýlyq saqtaý nysany salyndy, onyń 655-i «Aýyldyq densaýlyq saqtaýdy jańǵyrtý» ulttyq jobasy sheńberinde júzege asyryldy. 200-den astam nysan buryn medıtsınalyq kómek bolmaǵan eldi mekenderde ashyldy. Bul aýyl turǵyndarynyń shamamen bir mıllıon adamyn turǵylyqty jerinde medıtsınalyq qyzmetpen qamtýǵa múmkindik berdi, — dedi mınıstr.
Jambyl oblysynda ulttyq jobanyń sheńberinde medıtsınalyq-sanıtarııalyq alǵashqy kómek boıynsha josparlanǵan 30 nysannyń barlyǵynyń qurylysy aıaqtaldy.
Sonymen qatar mınıstr óńirdegi birqatar júıelik máselelerge nazar aýdardy. Jalpy ólim, júrek-qan tamyrlary aýrýlarynan bolatyn ólim jáne náreste ólimi kórsetkishteri boıynsha oń dınamıkaǵa qaramastan, ana ólimi kórsetkishi ósip otyrǵany atap ótildi.
2026 jyldyń 4 aıynda óńirde ana ólimi boıynsha 3 jaǵdaı tirkelgen. Qazirgi ýaqytta eki jaǵdaı boıynsha jospardan tys tekserýler júrgizilip jatyr.
— Ana ólimine qatysty árbir jaǵdaı jan-jaqty taldaýdy jáne júıeli sheshimderdi talap etedi. Júkti áıelderdi baǵyttaý, kadrlyq qamtamasyz etý jáne baqylaý máselelerine formaldy túrde qaramaı, patsıentterdi barlyq kezeńderde tolyq súıemeldeıtin júıe qurý qajet, — dedi Aqmaral Álnazarova.
Mınıstr alǵashqy býyn deńgeıinde onkologııalyq aýrýlardy erte anyqtaý jumysyn kúsheıtýdi, dıagnostıkalaý men qosymsha tekserýler sapasyn arttyrýdy, sondaı-aq vaktsınatsııalaý men týberkýlezdiń aldyn alý boıynsha halyqpen aqparattyq-túsindirý jumysyn jandandyrýdy tapsyrdy.
Sondaı-aq densaýlyq saqtaý salasyn tsıfrlandyrý jáne jasandy ıntellekt tehnologııalaryn engizý máselelerine erekshe kóńil bólindi.
Óńirde telemedıtsınany damytý, vaktsınalardy saqtaý úshin «sýyq tizbekti» tsıfrlyq monıtorıngteý, sondaı-aq jedel járdem brıgadalary úshin smart-beınejetondar men ıntellektýaldy beınebaqylaý júıelerin jetildirý josparlanǵan.
Mınıstr medıtsınalyq kómektiń ishki sapasyn baqylaýdy kúsheıtý, klınıkalyq standarttardy saqtaý, medıtsınalyq uıym basshylarynyń jaýapkershiligin arttyrý jáne azamattardyń ótinishterine jedel áreket etý qajettigin atap ótti.
Jumys saparynyń ekinshi kúninde mınıstrdiń birqatar medıtsınalyq nysandardy aralaýy, densaýlyq saqtaý salasynyń ardagerlerimen jáne Baızaq aýdany turǵyndarymen kezdesýi, sondaı-aq azamattardy jeke qabyldaýy josparlanǵan.
Aıta keteıik, elde qyzmetkerdiń skrınıngtik zertteýden ótý tártibi naqtylandy.
