Ana ólimin jasyrǵan aýdandyq aýrýhananyń dırektory jumysynan ketti - SQO

PETROPAVL. QazAqparat – Soltústik Qazaqstan oblysynda Taıynsha aýdandyq aýrýhanasynyń dırektory ana ólimine qatysty iste basy daýǵa qalyp, óz erkimen jumysynan ketti, dep habarlaıdy QazAqparat tilshisi.

SQO densaýlyq saqtaý basqarmasynyń basshysy Nurlan Aımanov jas ana Áıgerim Qazezovanyń ólimin bir aı boıy jasyrýǵa ne sebep túrtki bolǵanyn jáne osy faktige qatysty qandaı sharalar atqarylǵanyn baspasóz máslıhatynda aıtty.

Esterińizge salaıyq, Taıynsha aýdany Bolshoı Izıým eldi mekeniniń 34 jastaǵy turǵyny Áıgerim Qazezova oblystyq kópsalaly aýrýhanaǵa koronavırýs juqtyryp túsedi.

Júkti kelinshekti jaǵdaıy nasharlaı bastaǵasyn dárigerler kesar tiligi arqyly bosandyryp alady. Biraq ol birneshe kúnnen keıin 22 tamyzda ókpeniń qabynýynan oblystyq aýrýhanada kóz jumady. Emdeý mekemelerindegi «bylyq» osydan keıin bastalǵan. Jas ananyń ólimin jasyrý úshin aýrýhana mamandary Qazezovany qaǵaz júzinde Taıynsha aýrýhanasyna aýystyrǵan. Ol jerde bir aı boıy «emdegen». Máıitti týystaryna 22 tamyz kúni bergenimen, qaıtys bolǵany týraly qujattardy marqumnyń kúıeýi tek bir aıdan keıin alǵan.

Dárigerlerdiń ana ólimin jasyrýyna qatysty táýelsiz komıssııa qurylyp, olar isti búge-shigesine deıin tekserdi. Sarapshylar eki medıtsınalyq mekemeniń 10-ǵa jýyq qyzmetkeriniń

zańsyz áreketin áshkereledi.