Ana men sábı óliminiń kórsetkishi tómendedi - Densaýlyq saqtaý mınıstrligi
ASTANA. 15 sáýir. QazAqparat - QR Densaýlyq saqtaý mınıstrliginde ana men bala óliminiń kórsetkishin tómendetý, sondaı-aq qan aınalymy aýrýlarynan bolatyn ólim-jitim sanyn azaıtý úshin shuǵyl sharalardy qolǵa alý jónindegi respýblıkalyq shtabtyń kezekti otyrysy ótti,
dep habarlady pm.kz saıty atalmysh vedomstvonyń baspasóz qyzmetine silteme jasap.
Ana men sábı densaýlyǵyn qorǵaý Qazaqstandaǵy densaýlyq saqtaý salasynyń basym baǵyty bolyp tabylady. Elimizde balalar men analar júıeli túrde aldyn ala qaralýdan ótip otyrady. Olarǵa qajetti dári-dármek bólinedi.
«Aǵymdaǵy jyldyń 3 aıynda ana óliminiń kórsetkishi 21,3 paıyzǵa, sábı óliminiń kórsetkishi 10 paıyzǵa azaıǵan. Jáne de sábı óliminiń azaıýy elimizdiń barlyq óńirlerinde kórinis taýyp otyr», - delingen habarlamada.
QR Densaýlyq saqtaý mınıstrligi ana men sábı óliminiń kórsetkishin tómendetý boıynsha qolǵa alatyn júıeli sharalarynyń aıasynda 0 jastan 5 jas aralyǵyndaǵy búldirshinderdi dıspanserlik baqylaýdan ótkizý isin kúsheıtken.
