Ana men balany órtten qutqarǵan polıtseıler memlekettik nagradaǵa ıe boldy
QOSTANAI. QazAqparat – Qostanaıda ómirine qaýip tóngenine qaramastan erlik kórsetken tártip saqshylary marapattaldy, dep habarlaıdy QazAqparat.
Qostanaı oblysy Uzynkól aýdany polıtsııa bóliminiń qyzmetkerleri Qýanysh Shábdenov pen Saǵyndyq Jákenovke «Erligi úshin» medali tabys etildi. Memlekettik nagradany QR Prezıdentiniń atynan Іshki ister mınıstri Erlan Turǵymbaev tapsyrdy.
Mınıstr der kezinde turǵyndarǵa kómek kórsetken qostanaılyq polıtseılerdiń batyrlyǵyn atap ótti. Olar 2020 jyldyń 1 aqpanynda órtenip jatqan úıden 2 adamdy alyp shyqqan bolatyn.
«Osy kúni saǵat 18.20-da Uzynkól aýylyndaǵy eki qabatty úıdiń birinde órt shyqty. Ony polıtsııa júrgizýshisi, áriptesim Saǵyndyq Jákenov kóshe boıymen ótip bara jatyp, baıqap qaldy. Ol dereý oqıǵa ornyna júgirdi. Osy sátte men de gazdyń ıisin sezip, aýlaǵa shyqtym. Órtenip jatqan úıdiń mańynda turatyn edim. Birden órt qyzmetin shaqyryp, janyp jatqan turǵyn úıge umtyldym. Úıdiń kireberisi men qabyrǵalaryna qar tastap, elektr qýatyn óshirdim. Páterde anasy men uly bolǵan. Oılanyp tura almaısyń, esikti buzyp, ishke kirdik», - dep eske alady Uzynkól aýdany polıtsııa bólimi bastyǵynyń orynbasary Qýanysh Shábdenov.
Osylaısha, tártip saqshylary esinen tanyp qalǵan úı ıelerin syrtqa shyǵardy. S. Jákenov jalyn sharpyǵan páter ishinen gaz ballonyn alyp shyqty.
Mine, polıtsııa qyzmetkerleriniń batyl qımyly 36 jastaǵy jigit pen onyń 57 jastaǵy anasyn qutqardy.
«Mınıstr myrza aıtqandaı, bul marapat bizdiń kásibı eńbegimizdiń baǵasy ǵana emes, bul – tyń serpin, qosymsha jaýapkershilik. Halyq polıtsııaǵa senim artady. Biz sol senimdi aqtaýymyz qajet. Ol úshin boıdaǵy bilim men tájirıbemizdi jumsaýǵa mindettimiz», – dedi S.Jákenov.
