Ana men bala ulttyq ǵylymı ortalyǵynda Neonataldy hırýrgııa boıynsha úılestirý ortalyǵy quryldy
ASTANA. 17 aqpan. QazAqparat - «Densaýlyq saqtaý mınıstrligi Ana men bala ulttyq ǵylymı ortalyǵynda Neonataldy hırýrgııa boıynsha úılestirý ortalyǵyn qurdy»,dep habarlaıdy atalmysh vedomstvonyń baspasóz qyzmeti.
Mundaǵy maqsat - jańa týylǵan sábılerge medıtsınalyq kómek kórsetýdi halyqaralyq standarttarǵa saı jetildirý bolyp otyr. Atalǵan joba sheńberinde elimizdiń óńirlerinde týa bitken damý kemshiligimen dúnıege kelgen sábılerge hırýrgııalyq kómek kórsetýge saraptama jasaý, uıymdastyrý jáne emdeý-dıagnostıkalyq sharalar keshenin halyqaralyq standattarǵa sáıkestendirý, óńirlerge jańa tehnologııalardy transfertteý úshin ortalyqta oqytý baǵdarlamalaryn engizý josparlanyp otyr.
Qazirgi ýaqytta Ana men bala ulttyq ǵylymı ortalyǵynda neonataldy hırýrgııalyq kómek kórsetý úshin qolaıly jaǵdaılar jasalyp, operatsııa blogtary zamanaýı endobeınehırýrgııalyq tirektermen jaraqtanǵan. Ortalyq qyzmetkerleri jaqyn jáne alys shet memleketterdiń klınıkalarynda oqǵan. Reseı, Avstrııa, Germanııanyń aldyńǵy qatarly hırýrgtarynyń qatysýymen sheberlik- synyptary turaqty ótkizilip turady. Ortalyqtyń hırýrgtary klınıkalyq tájirıbege damý kemshilikteri men keýde qýysy organdarynyń (dıafragmaldy jaryq, sary sý, keýde qýysyndaǵy isikter), qursaq qýysy organdarynyń (baýyrdaǵy sary sý, ót joldary júıesindegi, qursaq qýysyndaǵy sary sý, holetsıstıt, splenektomııa, nefrektomııa, gernıorafııa, varıkotsel, krıptorhızm kezindegi sary sýlar) aýrýlary kezinde laporoskopııalyq operatsııalar jasaý sııaqty kishiınvazıvti ádistemelerdi endirdi.
Osy ádisterdi qoldaný atalǵan patologııalary bar balalardy emdeý nátıjelerin birshama jaqsartýǵa, ıaǵnı operatsııadan keıingi asqynýlar sanyn azaıtýǵa múmkindik berdi. Ortalyqta alǵash ret «gırpshprýng» aýrýyna laparoskopııalyq jáne transanaldy túzetý jasaldy. Osy endirilgen tehnologııalar týa bitken damý kemshilikteri bar balalardyń ómir sapasyn damytý múmkinshiligin birshama arttyrady.
