Ana men bala ulttyq ǵylymı ortalyǵy bedeldi amerıkalyq táýelsiz uıymnyń akkredıtatsııasyn alýǵa nıetti
ASTANA. Aqpannyń 22-si. QazAqparat /Gúlmıra Álıakparova/ - Ana men bala ulttyq ǵylymı ortalyǵy (ABUǴO) táýelsiz amerıkalyq uıym - Medıtsınalyq mekemelerdi akkredıtteý jónindegi halyqaralyq komıssııanyń (JCI) akkredıtatsııasyn alýǵa nıetti. Búgin atalmysh Komıssııanyń bir top delegaty ABUǴO-nyń daıyndyq kúıine baǵa berý úshin Astanaǵa keldi,
dep habarlaıdy QazAqparat.
JCI - bul júz jyl boıy medıtsınalyq qyzmetterdiń sapasyna baǵa berip kele jatqan amerıkalyq táýelsiz qoǵamnyń halyqaralyq organy. JCI-dyń akkredıtatsııasy aýrýhanadaǵy medıtsınalyq qyzmettiń eń joǵary sapasyn, naýqastardyń qaýipsizdigi men em-domnyń eń durys tásilderi qoldanylyp otyrǵandyǵyn kórsetedi. Sonymen birge, ol emhanalarǵa shet elderden naýqastardy tartýǵa múmkindik beredi.
ABUǴO-nyń Medbıkelik is jónindegi dırektory Djoana Kameronnyń sózine qaraǵanda, búgingi kúni JCI-dyń akkredıtatsııasyna álemniń 60-tan astam eliniń medıtsınalyq mekemeleri ıe. Aıta keteıik, TMD-ǵa qatysýshy elderdiń birde-bir densaýlyq saqtaý mekemesi oǵan áli qol jetkizgen joq.
JCI músheleri Ana men bala ulttyq ǵylymı ortalyǵyna baǵalaýdy eki baǵytta júrgizetin bolady - medıtsınalyq qyzmettiń jalpy jaǵdaıy jáne emhananyń ákimshilik basqarýy. D.Kameronnyń aıtýynsha, JCI aldymen, amhanaǵa aldyn ala baǵalaý jasaıdy jáne onyń barysynda anyqtalǵan kemshilikterdi joıý úshin is-sharalar josparyn usynatyn bolady. Óz kezeginde ABUǴO jospardaǵy eskertýlerdi bir jyldyń ishinde joıý úshin bar kúshterin salatyn bolady. Solaı, 2011 jyly akkredıtatsııadan ótýge resmı túrde ótinim jasamaq.
Esterińizge sala keteıik, Ana men bala ulttyq ǵylymı ortalyǵynyń basqarylýy 2009 jylǵy naýryzdyń 12-sinde avstrııalyq Vamed kompanııasyna resmı túrde berilgen bolatyn. Bul Qazaqstan Prezıdenti N.Nazarbaevtyń Ulttyq medıtsınalyq holdıngi bazasynda halyqaralyq jetekshi kompanııanyń basqarýyndaǵy «Bolashaq gospıtalin» qurý týraly tapsyrmasyn júzege asyrý maqsatynda jasaldy. Oǵan sáıkes basqarý merzimi belgilengen 2 jyl 9 aıdyń ishinde Vamed kompanııasy atalmysh Ortalyqta aýrýhanany basqarý jónindegi tıimdi menedjmentti júzege asyryp, halyqaralyq standarttardy engizý, naýqastardyń qaýipsizdigin qamtamasyz etý sondaı-aq Ana men bala ortalyǵy halyqaralyq deńgeıdegi akkredıtatsııalarǵa ıe bolýy úshin qyzmet jasaýy tıis.
