Ana men bala Ulttyq ǵylymı ortalyǵy Astana kúnin atap ótti
ASTANA. Shildeniń 2-si. QazAqparat - Astana kúnin merekeleý aıasynda shildeniń 1-i men 2-si kúnderi Ana men bala Ulttyq ǵylymı ortalyǵynda balalarǵa arnalǵan merekelik shara ótti.
Bul týraly Ortalyqtyń baspasóz qyzmetinen habarlady.
Búgingi kúni Ortalyqta Qazaqstannyń barlyq aımaqtarynan 250 bala emdelip jatyr. ABUǴO qyzmetkerleri olarǵa mindetti emdeý sharalarymen birge, kóterińki kóńil-kúı syılaý maqsatynda elordanyń týǵan kúnine arnalǵan merekelik baǵdarlama uıymdastyrdy.
«Astana - bolashaqtyń qalasy» atty is-sharanyń uıymdastyrýshylary balalardyń arasynda óleńder, Qazaqstannyń bas qalasyna arnalǵan shyǵarmalar men asfalt betindegi sýretter atalymdary boıynsha baıqaýlar ótkizdi.
Shara sońy «Renessans» bı stýdııasy men Ortalyqta emdelip jatqan balalardyń kúshimen daıyndalǵan merekelik kontsertke ulasty.
