«Ana men bala» ortalyǵynda onkologııalyq aýrýdy jeńgen balalar arasynda sport jarystary ótedi
NUR-SULTAN. QazAqparat - Balalardy qorǵaý kúnine oraı Nur-Sultan qalasynda 1-2 maýsym kúnderi «UMC» KQ «Ana men bala» ulttyq ǵylymı ortalyǵynyń onkologııa jáne búırek pen baýyr transplantatsııasy bólimsheleriniń burynǵy patsıentteri arasynda Chempıondardyń alǵashqy respýblıkalyq oıyndary - sport jarystary ótedi
Jarystar jeńil atletıka (júgirý, 60 m), «Asyq atý» ulttyq oıyny, ústel tennısi, atý (pnevmatıkalyq vıntovka, 10 m), fýtbol (mını-fýtbol), shahmat (Shveıtsarııa júıesi boıynsha), boýlıng sekildi sport túrlerinen ótedi.
Oıynǵa 3 jastan 16 jasqa deıingi aýrýdy jeńgen 106 bala qatysady. Atalǵan is-sharanyń basty maqsaty - aýrýmen uzaq ýaqyt boıy kúresip, ony jeńgen balalarǵa ómirge qaıta oralýǵa jáne aıaǵynan turýǵa kómektesý.
Qazaqstanda oıyndardy ótkizý bastamashysy - «Ana men bala» ulttyq ǵylymı ortalyǵy. Ortalyqqa QR Densaýlyq saqtaý mınıstrligi Tsıfrlandyrý keńsesiniń qoldaý kórsetip otyr.
Sondaı-aq, is-sharaǵa qazaqstandyq estrada juldyzdary Marjan Arapbaeva, Qazaqstannyń H-faktor baıqaýynyń jeńimpazy Dılnýra Birjanova, Erlan Kókeev jáne sport qaıratkerleri - bokstan olımpıada chempıony Serik Sápıev jáne Qazaqstandaǵy ıÝNISEF elshisi - shahmattan álem chempıony Dınara Sádýaqasova qatysady. Jarystar 1 jáne 2 maýsym kúnderi saǵat 09.00-de Qabanbaı batyr dańǵyly, 47 mekenjaıy boıynsha ornalasqan «Alaý» muz aıdyny alańyna ótedi.
