«Ana men bala» ortalyǵynda mıdy emdeıtin qymbat apparat paıda boldy
«Ana men bala» ortalyǵyna ornatylǵan Tecotem neo apparaty «Aıala» qaıyrymdylyq qorynyń «Baqylanatyn gıpotermııa» jobasy aıasynda satyp alyndy. Quralǵa qajetti qarjyny qordyń seriktesteri bergen. Al 2 900 000 teńgeni «Astana marafon-2017» marafonynyń qatysýshylary jınady.
«Atalǵan apparat álemde belsendi túrde qoldanyla bastady. Qazaqstanda alǵash bolyp Astana men Almaty qalalaryna eki apparat alyndy. Kútip ustasa on jylǵa deıin qyzmet etedi. Jaqyn arada Lıtvadan mamandar aldyrtyp, atalǵan apparatmen qalaı jumys isteý kerektigin úıretemiz», - dedi «Aıala» qaıyrymdylyq qorynyń medıtsınalyq jobalarynyń jetekshisi Berik Darjanov.
Onyń aıtýynsha, gıpotermııa ádistemesi álemdik tájirıbede keń taralǵanymen gıpotermııa apparatynyń qoldanysqa engenine kóp bolǵan joq.
«Bul apparat asfıksııadan keıin balalardyń kúrdeli jaǵdaıdan shyǵyp, ońalýyna septigin tıgizedi. Búginde álem boıynsha týǵan balalardyń 23 paıyzy osyndaı dertpen týady. Al Qazaqstanda shamamen 10 paıyzdy quraıdy», - dedi Darjanov.
Aıta keteıik, «Aıala» qaıyrymdylyq qory elimizdegi balalar medıtsınasy salasynda 10 jyldan beri jumys istep keledi. Osy jyldar ishinde atalǵan qor Qazaqstandaǵy birqatar medıtsınalyq jáne bilim berý mekemeleri men áleýmettik nysandarǵa qajetti jabdyqtardy alýǵa qoldaý bildirdi.