Ana men bala ólimin azaıtý úshin qandaı sharalar jasaldy – QR DSM
ASTANA. KAZINFORM – Jyl basynan beri elimizde ana óliminiń kórsetkishi 10%-ǵa, náreste ólimi kórsetkishi 26%-ǵa tómendedi. Bul týraly Densaýlyq saqtaý mınıstri Aqmaral Álnazarova Úkimet otyrysynda aıtty.
Mınıstrdiń aıtýynsha, elimizde 2030 jylǵa deıin ana men bala densaýlyǵyn saqtaý qyzmetin damytý jospary bekitilgen. Sondaı-aq elimizde ana men bala densaýlyǵy boıynsha Ornyqty damý maqsattarynyń ındıkatorlaryna qol jetkizilgen.
– Dúnıejúzilik densaýlyq saqtaý uıymy men ıÝNISEF-tiń perınataldyq kómekti óńirlendirý jáne ana qaýipsizdigi qaǵıdattarynyń tıimdi tehnologııalary boıynsha usynymdaryn engizý arqyly 2024 jyly ana óliminiń kórsetkishi 12%-ǵa, náreste óliminiń kórsetkishi 11%-ǵa tómendegen. Al bıylǵy 6 aıda ana óliminiń kórsetkishi 10%-ǵa, náreste ólimi kórsetkishi 26%-ǵa tómendedi, – dedi mınıstr búgingi Úkimet otyrysynda.
Bul kórsetkishterge jetý úshin birqatar júıeli shara qabyldanǵan. Elimiz ana men balaǵa medıtsınalyq kómek kórsetýdiń jańa tásilderin engizip, standarttar men klınıkalyq hattamalardy pysyqtaǵan (akýsherııa salasynda 25 jáne pedıatrııa boıynsha 20 hattama).
– 2024 jyldyń 1 maýsymynda bosandyrý, akýsherlik operatsııalar, salmaǵy tómen jańa týǵan nárestelerdi kútý jáne pedıatrııalyq beıinderdiń tarıfteri ulǵaıdy. Mysaly, dıagnozdardyń aýyrlyǵyna qaraı kesar tiligin jasaý qyzmeti 323 myń teńgeden 440 myń teńgege deıin (36%) ulǵaıdy. Osy maqsatqa qosymsha 20 mlrd teńge bólinip, medıtsınalyq uıymdardyń kredıtorlyq bereshegin tómendetýge jáne naqty shyǵyndaryn óteýge, qymbat preparattarǵa qoljetimdilikti jaqsartýǵa, tájirıbeli mamandardy turaqtandyrýǵa jaǵdaı jasaldy, – dep atap ótti A. Álnazarova.
Bosanǵannan keıingi qan ketýdiń aldyn alýdyń jańa ádisteri engizildi, nátıjesinde bıyl organdy saqtap qalý operatsııalary 20%-ǵa artqan.
Medıtsınalyq avıatsııa jelisi boıynsha der kezinde jáne joǵary mamandandyrylǵan medıtsınalyq kómek kórsetý sharalary aýyr jaǵdaıdaǵy áıelder men balalardyń 96%-yn qutqaryp qalǵan.
Ótken jyldan bastap bosandyrý jáne balalarǵa arnalǵan uıymdardyń medıtsınalyq tehnıkamen jabdyqtalýy 87% deıin jaqsaryp, tozý kórsetkishi 37% deıin tómendegen.
Buǵan deıin Aqmaral Álnazarova aýyldyq jerlerdegi medıtsınalyq kadr tapshylyǵy máselesi qalaı sheshiletinin aıtyp bergen edi.