Ana men bala ólimin azaıtý jónindegi profılaktıkalyq jumystarǵa 6,7 mıllıard teńge qarastyrylǵan - Densaýlyq saqtaý mınıstrligi
ASTANA. 22 shilde. QazAqparat - Densaýlyq saqtaý mınıstri Salıdat Qaıyrbekovanyń tóraıymdylyǵymen búgin telekonferentsııa rejıminde Ana men bala ólimin jáne qan aınalymy júıesiniń aýrýlarynan bolatyn ólim-jitimdi azaıtý jónindegi kezek kúttirmes sharalar qabyldaý jónindegi respýblıkalyq shtabtyń otyrysy ótti.
Bul týraly Densaýlyq saqtaý mınıstrliginiń baspasóz qyzmetinen habarlady.
Májiliske oblystar men Astana jáne Almaty qalalary densaýlyq saqtaý basqarmalarynyń basshylary, salalyq respýblıkalyq emhanalardyń, bilim berý uıymdarynyń, aımaqtyq densaýlyq saqtaý vedomstvolarynyń basshylary qatysty.
Májiliste ana ólimi men perınataldyq ólim-jitim problemalary jáne olardy azaıtýdyń joldary, qan aınalymy júıesi aýrýlary men odan bolatyn ólim-jitimniń keıbir máseleleri, sondaı-aq bastaýysh medıko-áleýmettik kómek deńgeıinde jan basyna shaqqandaǵy normatıvtiń komponentin yntalandyrý máseleleri talqylandy.
2011 jyldyń І jartyjyldyǵynda ana ólimi kórsetkishi, aldyńǵy jyldyń sáıkes kezeńimen salystyrǵanda, 44,5 paıyzǵa (2010 jyldyń І jartyjyldyǵynda - 31,0 paıyz), bala shetineýi - 13 paıyzǵa (2010 jyldyń І jartyjyldyǵynda - 15,4 paıyz) azaıǵany baıqalady. Al qan aınalymy júıesi aýrýlarynan bolatyn ólim-jitim kórsetkishi 2011 jyldyń 5 aıynda respýblıka boıynsha, 2010 jyldyń sáıkes kezeńimen salystyrǵanda, 5,7 paıyzǵa azaıǵan.
Ana men bala ólimin azaıtý jónindegi profılaktıkalyq jumystarǵa 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń aıasynda aǵymdaǵy jyly 6,7 mıllıard teńge qarastyrylǵan.
