Ana men bala densaýlyǵy máselesi ózektiligin saqtap otyr - Aıda Balaeva
Ulttyq komıssııanyń saraptamalyq monıtorıngtik toby óńirlerge baryp, osy máselelerdiń jaı-kúıin egjeı-tegjeıli zerdelep, óz baǵalary men usynymdaryn jetkizgen.
Ulttyq komıssııa otyrysyna sarapshylar qaýymdastyǵynyń ókilderi, óńirler ákimderiniń orynbasarlary, ortalyq memlekettik organdardyń basshylary qatysty.
Otyrysqa qatysýshylar aldynda ulttyq komıssııa tóraǵasy, Prezıdent Ákimshiligi Basshysynyń orynbasary Aıda Balaeva ana men bala densaýlyǵyn qorǵaý - memlekettik saıasattyń mańyzdy baǵyty ekenin atap ótti. Bul máseleniń jalpyulttyq mańyzy bar jáne memleket iske asyryp jatqan áleýmettik-ekonomıkalyq jáne emdeý-profılaktıkalyq sharalar keshenin tıimdi úılestirýdi talap etedi.
«Ana men balany qorǵaý máseleleri joǵary ózektiligin saqtap otyr. Jergilikti jerlerde ınfraqurylymnyń qoljetimdiligin keńeıtý, táýekel toptardyń habardar bolýy, ýákiletti organdardyń jaýapkershiligin arttyrý talap etiledi.
Ana men bala óliminiń aldyn alý keshenin qalyptastyrýǵa jańa tásilder engizý, osy máselelerdi zertteýge qoǵamdyq uıymdardyń resýrstaryn, ǵalymdar men sarapshylardy belsendi tartý mańyzdy. Júktilikti júrgizý jáne anany qoldap otyrý protsesterinde táýekelderdi anyqtaý jáne aldyn alý júıesin jetildirý qajet», - Aıda Balaeva.
Óńirlerdegi monıtorıngtik saraptama tobynyń jumysyn senator Lázzat Súleımen basqardy.
Ulttyq komıssııa otyrysynda sóz sóılegen ol bosanatyn áıelder men jańa týǵan náresteler arasyndaǵy ólim-jitimniń ósýiniń negizgi tendentsııalaryn atap ótti. Senator óńirlerdegi perzenthanalarǵa, perınataldyq ortalyqtarǵa baryp, qatardaǵy dárigerlermen jáne bosanatyn áıelderdiń ózderimen tikeleı baılanys jasaý barysynda osy máselelerdi egjeı-tegjeıli zerdelegen sarapshylardyń jumysyna toqtaldy.
Akýsherlik, gınekologııa jáne perınatologııa salasyndaǵy sarapshy Záýresh Amanjolova ambýlatorııalyq jáne statsıonarlyq kómektiń oń jáne keıbir problemalyq máselelerin áńgimeledi.
S. Asfendııarov atyndaǵy Qazaq ulttyq medıtsına ýnıversıtetiniń balalar aýrýlary kafedrasynyń professory, neonatolog Nıshankúl Bojbanbaeva náresteler ólimin tómendetý boıynsha naqty usynystar jasady.
Densaýlyq saqtaý mınıstri Ajar Ǵınııat aǵymdaǵy jaǵdaı men osy saladaǵy jumys júıesin jetildirý sharalary týraly baıandady.
Aıtylǵan baıandamalar men pikirlerdi eskere otyryp, otyrysqa qatysýshylar ana men balany qorǵaý saıasatyn qaıta júkteý, ortalyq jáne óńirlik deńgeılerde qabyldanatyn sharalardy jetildirý qajettiligi týraly pikir bildirdi.
Ulttyq komıssııa basshysy densaýlyq saqtaý mınıstrligine sarapshylar aıtqan eskertýler men usynystardy eskerýdi tapsyrdy.
Ana men bala ólimin azaıtý jónindegi respýblıkalyq jáne jergilikti shtabtardyń jumysyn jandandyrý qajettigi aıtyldy, ony Densaýlyq saqtaý mınıstri men óńirlerdiń ákimderi basqarýǵa tıis.
A.Balaeva shalǵaı eldi mekenderde bosanatyn áıelder úshin qolaıly orta men tıimdi ınfraqurylym qurý qajet ekenin atap ótti.
Sondaı-aq, feldsherlik-akýsherlik pýnktter men dárigerlik ambýlatorııalardaǵy medıtsınalyq personal tapshylyǵy máselesin medıtsınalyq joǵary oqý oryndarynyń túlekterin maqsatty bólý arqyly sheshý mindeti qoıyldy.
Dárigerlerdiń kásibı ósýi úshin jaǵdaılardy qamtamasyz etýdiń mańyzdylyǵy jáne onyń bosandyrý kezindegi dárigerlik qatelikterdiń qaýpin azaıtýǵa áseri erekshe atap ótildi.
Densaýlyq saqtaý mınıstrligine Qarjy mınıstrligimen jáne ákimdiktermen birlesip, naqty shyǵyndardy eskere otyryp, bosandyrý qyzmetterine tarıfterdi arttyrý múmkindigin qarastyrý tapsyryldy.
Ulttyq komıssııaǵa óńirlik deńgeıde ana men balany qorǵaý salasyndaǵy egjeı-tegjeıli monıtorıngti jalǵastyrý jáne belgilengen mindetterdi sheshý barysyna qoǵamdyq baqylaýdy júzege asyrý júkteldi.
