Ana men bala árqashanda bizdiń nazarymyzda, memlekettiń qamqorlyǵynda - Elbasy
aýryzdyń 5-i. QazAqparat /Rýslan Ǵabbasov/ - Ana men bala árqashanda memlekettiń qamqorlyǵynda bolady.
Bul týraly búgin Aqordada Elbasy Nursultan Nazarbaev halyqaralyq áıelder kúnine arnalǵan kezdesýde aıtty, dep habarlaıdy QazAqparat.
«Ana men bala árqashanda bizdiń nazarymyzda, memlekettiń qamqorlyǵynda ekenin bilesizder. Áıelder men balalarǵa áleýmettik kómek memlekettiń tarapynan jyldan-jylǵa ósip keledi. Memlekettiń ekonomıkasy órkendegen saıyn kómektiń deńgeıi de arta túsedi», dep atap ótti Elbasy.
Osy oraıda Memleket basshysy bıylǵy jylǵy qańtardyń 1-inen bastap «Altyn alqa» endi 7 bala tárbıelegen anaǵa, sondaı-aq «Kúmis alqa» 6 balany ósirgen anaǵa beriletinin eske salyp ótti.
«Ótken jyly balanyń týylǵanyna tólenetin birjolǵy járdemaqyny 350 myńnan astam ana aldy. Balany kútýdiń 1 jylǵa deıingi járdemaqysy 140 myń otbasyǵa tólendi. Bul bizdiń el úshin óte úlken kórsetkish», dedi Prezıdent.
Elbasy bul maqsatqa barlyǵy 30 mıllardqa tarta teńge baǵyttalǵanyn jetkizdi. «Ótken jyly 18 jasqa deıingi balalarǵa arnalǵan járdemaqyǵa 8,5 mlrd. teńgeden astam qarjy belgilendi. Árıne, bul qarjyny damýǵa, ónerkásipke, jumys oryndaryn qurýǵa baǵyttaýǵa bolar edi. Alaıda ana men bala qamqorlyǵyn mańyzdy dep sanaımyz», dedi N. Nazarbaev.
