Ana quqyǵynan aıyrylǵan qostanaılyq bir jarym jyldan keıin balasyn qaıtaryp aldy
QOSTANAI. QazAqparat - Qostanaıda taksıde qyzyn umyt qaldyrǵany úshin analyq quqyǵynan aıyrylǵan kelinshek shekteýdiń kúshin joıýǵa qol jetkizdi, dep habarlady «QazAqparat» HAA tilshisi.
Qostanaı turǵyny 2015 jylǵy jeltoqsanda analyq quqyǵynan aıyrylǵan, ıývenaldyq sot ony mas kúıinde 5 jasar qyzyn taksıge qaldyryp ketkeni úshin aıypty dep tanydy.
Prokýratýra bóliminiń prokýrory Janna Ybyraevanyń túsindirýinshe, kólikte balasyn umytyp qaldyrǵannan keıin ol ony izdep ishki ister organdaryna júginbegen.
«Ol esh jerde jumys istemeıdi, turmysy nashar», - dedi J. Ybyraeva. - Alaıda sot sheshimimen qyz «Januıa» otbasylyq túrindegi aýylǵa turýǵa jiberilgennen keıin anasy óziniń ómirin túbegeıli ózgertken: jumysqa ornalasyp, ishimdikti qoıyp, úıine jóndeý jumystaryn júrgizgen.
Sotqa júgingen áıel oǵan múmkindik berip, qyzyn qaıtarýdy ótingen. Ol qyzyna únemi baryp turǵanyn, balany baǵyp-qaǵýǵa 204 myń kóleminde alıment tólegenin alǵa tartqan.
«Mundaı jaǵdaılarda quzyrly organ kámelettik jasqa tolmaǵan balanyń múddesi úshin anasynyń talap-aryzyn qanaǵattandyrýǵa kelisti, - dep atap ótti J. Ybyraeva. - Qyz otbasyna qaıtaryldy».
