Ana bolýdy armandaıtyn aqtóbelik áıelderge ota jasaldy
AQTÓBE. QazAqparat - Aqtóbede túrli dertke shaldyqqan áıelderge ota jasaldy. Jatyr isigi, endometrıoz, jynys múshesi damýynyń anomalııasy dertine shaldyqqan áıelder otadan soń bala súıe alady, dep habarlaıdy QazAqparat tilshisi.
Aqtóbedegi perenataldyq ortalyqta sheberlik sabaǵy ótip jatyr. Endoskopııalyq hırýrgııa ádisimen tek oblys ortalyǵynda emes, 8 aýdandyq aýrýhanada ota jasalady. Bıyl Temir men Oıyl aýdanynda endovıdeohırýrgııalyq ádis qoldanylýda. Bul ádispen bedeýlik dertine shaldyqqan 16 aqtóbelik áıelge kómek kórsetildi. Sheberlik sabaǵyn Almatydaǵy reprodýktıvtik medıtsına ınstıtýty EKO ortalyǵynyń bas dárigeri Danııar Jaqypov ótkizdi. Ota jasaý, áıelderdi júktilikke daıyndaý, jasandy uryqtandyrý joldaryn aqtóbelik dárigerler meńgerip, sheberlikterin shyńdady.
«Otbasyly adamdardyń 16-17 paıyzynda bedeýlik derti bar. Sondyqtan Aqtóbede jasandy uryqtandyrý ortalyǵy ashylyp, endoskopııalyq ádispen ota jasaý da qarastyryldy. Otadan soń áıelder tabıǵı jolmen júkti bolady nemese jasandy uryqtandyrýǵa jol ashylady. Jergilikti dárigerler áıeldi júktilikke daıyndaýdyń barlyq jolyn jetik meńgerý tıis»,- dedi Aqtóbe oblystyq densaýlyq saqtaý basqarmasy basshysynyń orynbasary Svetlana Esenamanova.
Almatydaǵy reprodýktıvtik medıtsına ınstıtýty EKO ortalyǵynyń bas dárigeri Danııar Jaqypov elimizde jasandy uryqtandyrý baǵdarlamasyna bólinetin qarjyny arttyrýǵa usynys berilgenin jetkizdi. Sebebi, Eýropa elderinde reprodýktıvti hırýrgııaǵa emes, ekstrokorporaldi uryqtandyrý baǵdarlamasyna basymdyq berilgen.
