«Ana bolǵym keledi»: Mańǵystaýlyq jup 26 jyl kútken qýanyshymen bólisti
Mańǵystaýlyq erli-zaıypty Aqbaıan men Saǵynbaı «Jibek Joly» telearnasyndaǵy «Ana bolǵym keledi» baǵdarlamasy aıasynda ata-ana ataný baqytyna ıe boldy, dep habarlaıdy QazAqparat.
Jyl basynan «Jibek Joly» arnasynda jýrnalıst Láılá Sultanqyzynyń «Ana bolǵym keledi» avtorlyq baǵdarlamasy kórermenge jol tartqan bolatyn. Baǵdarlamaǵa «Ańsaǵan sábı» memlekettik kvotasyna belgili sebepterge baılanysty ilige almaǵan, óz qarajatyna birneshe márte ekstrakorporaldy uryqtandyrý (EKU) jasaýǵa talpynǵan, genetıkalyq dertke baılanysty sábıli bola almaı júrgen otbasylar tańdap alynǵan bolatyn. EKU shyǵyndary «Maryam» qaıyrymdylyq qoryna túsken qarajat esebinen óteledi. Ótken jyly qaıyrymdy jandardyń kómegimen 5 áıel júkti bolyp, uzaq ýaqyt kútken sábılerin qushaǵyna aldy. Búginde joba aıasynda 12 otbasylyq juptyń náresteli bolýyna Almaz Qurmanáliuly bastaǵan elordanyń bilikti dárigerleri aıanyp qalmaýda.
Ujymdyq eńbektiń arqasynda jańaózendik Aqbaıan esimdi patsıenttiń uzaq kútken armany oryndalǵan bolatyn. Joba barysynda jasalǵan ekinshi embrıon tasymalynan keıin onyń júkti ekendigi anyqtaldy.
Aqbaıan men Saǵynbaıdyń qýanyshyna ortaqtasyp, «Ana bolǵym keledi» baǵdarlamasynyń shyǵarmashylyq ujymy arnaıy Mańǵystaý óńirine sapar shekti.
Aqtaý qalasyndaǵy Ekomed ortalyǵynda bilikti dáriger Aıgerim Jarylǵapqyzy Aqbaıannyń júktiliginiń damýyn ýltradybystyq zertteýdiń kómegimen baqylady. Іshtegi shaqalaqtyń júrek qaǵysyn estýge múmkindik boldy. Bul baqytty sátti otaǵasy Saǵynbaı myrza 26 jyl boıy sabyrmen kútken edi (otbasy óz qarajatyna eki-úsh márte EKO jasatqan, nesıe alǵan, úılerinde órt bolǵan, biraq ajyrasý týraly múldem oı bolmaǵan).
Ata-ana baqytyn sezinip, úlken armanyna qol jetkizgen Aqbaıan men Saǵynbaı endi ózderi de «Maryam» qaıyrymdylyq qoryna demeýshilik kórsetip, basqa januıalardyń baqytyna sebepshi bolǵysy keledi.
