Ana bolǵym keledi: Jibek Joly arnasyndaǵy áleýmettik joba aıasynda 11 sábı dúnıege keldi
ASTANA. KAZINFORM – Jibek Joly telearnasyndaǵy «Ana bolǵym keledi» baǵdarlamasy aıasynda ekstrakorporaldy uryqtandyrý jolymen 19 áıel qursaq kótergen. Dúnıege 6 ul, 5 qyz bala keldi.
«Ana bolǵym keledi» áleýmettik jobasynyń efırge shyqqanyna bir jyldaı boldy. Shyǵarmashylyq top eldiń 13 óńirine bardy. 41 ret operatsııa zalyna kirip, embrıon tasymalyna kýá boldy. Joba jetekshileriniń aıtýynsha, basty maqsat – eldegi bilikti dárigerlerdi dáripteý, shetelden kem túspeıtin emhanalardyń jumysyn tanystyrý jáne EKU jolymen balaly bolýdyń esh sókettigi joq ekenin jurtqa túsindirý.
«Osy tusta Jibek Joly arnasynyń basshylaryna alǵys aıtqym keledi. Óıtkeni, bul – áleýmettik joba. Prezıdent teleradıokesheni bul turǵyda aýqymdy eńbek atqardy. Jalpy, daıyndyq byltyr aqpan aıynda bastalǵan. Túsirilim kezinde túrli jaǵdaı boldy. Baǵdarlamaǵa qatysqan patsıentterdiń turmys-tirshiligin ary qaraı da kórsetemiz», - deıdi joba avtory Láılá Sultanqyzy.
Baǵdarlamaǵa túrli sebeppen «Ańsaǵan sábı» memlekettik baǵdarlamasyna iline almaı qalǵan otbasylar tańdap alynǵan. Kórermen yqylasyna bólenip úlgergen joba aıasynda perzent ańsaǵan 25 jupqa kómek kórsetildi. Olar ortasha quny 2 mln teńge turatyn medıtsınalyq qyzmetti tegin aldy.
Aıta ketsek, bıyl «Ańsaǵan sábı» baǵdarlamasynyń arqasynda perzentti bolǵan 100-den astam ata-ana Astanada bas qosqan bolatyn. Ózara pikir almasyp, ózgelerge keńes berdi. Olardyń biri baǵdarlamanyń arqasynda júre paıda bolǵan bedeýlikke qaramastan eki bala súıse, ekinshisi tuńǵysh balasyn ekstrakorporaldy uryqtandyrý arqyly dúnıege ákelip, ekinshi balasyn tabıǵı jolmen kótergen.
Altynbek Ámıt
