«Án suńqary - Nuraǵań, jyr tulpary - Tumaǵań»
ASTANA. 17 naýryz. QazAqparat - «Qazaqstan» Ulttyq arnasynda kompozıtor N. Tilendıev pen aqyn T. Moldaǵalıevti eske alý keshi kórsetiledi.
Nurǵısa Tilendıev - qazaqtyń mýzykalyq mádenıetine kompozıtor, dırıjer, oryndaýshy retinde óshpes iz qaldyrǵan óner ıesi. Ol 500-den astam mýzykalyq týyndylardyń avtory.
Onyń «Aqqý», «Ata tolǵaýy», «Álqıssa», «Farabı sazy» sııaqty kúıleri men «Sarjaılaý», «Alataý», «Qustar qaıtyp barady», «Óz elim» sııaqty ánderi halyqtyq boıaý naqyshynyń qanyqtyǵymen, ózindik qoltańbasynyń aıqyndyǵymen jurtshylyqtyń súıip tyńdaıtyn rýhanı qazynasyna aınalǵan.
Sazgerdiń birqatar ánderiniń sózin aqyn Tumanbaı Moldaǵalıev jazdy. Sodan bolar, halqy qos perzentin «án suńqary» men «jyr tulpary», dep baǵalady.
Sazgerdiń «Qustar qaıtyp barady» ániniń sózin de Tumanbaı Moldaǵalıev jazǵan.
Birde aqynǵa N.Tilendıev «Seniń óleńderińe alda talaı án jazamyn. Biraq ta, dál osyndaı án qaıta shyqpaıdy. Meni aqtyq saparǵa osy ándi aıtyp, shyǵaryp salyńdar», - dep amanat etken eken.
«Otyrar sazy» akademııalyq orkestriniń án men jyr dúldúlderi kompozıtor N. Tilendıev pen aqyn T. Moldaǵalıevti eske alý keshin búgin 19.30-da Ulttyq arnadan kóre alasyzdar.
