Án dúldúli Ǵarıfollaǵa arnalǵan respýblıkalyq baıqaý márege jetti
ORAL. QazAqparat - Batys Qazaqstanda ataqty ánshi-kompozıtor, Qazaqstannyń halyq ártisi, Memlekettik syılyqtyń laýreaty Ǵarıfolla Qurmanǵalıevtiń 110 jyldyǵyna arnalǵan merekelik sharalar márege jetti, dep habarlaıdy QazAqparat tilshisi.
Oblys ortalyǵy Oral qalasynda bastalǵan, eki kúnge sozylǵan óner meıramy án dúldúliniń týǵan jeri - Qaratóbe aýdanynda jalǵasty.
Oralda Qadyr Myrza Álı atyndaǵy mádenıet jáne óner ortalyǵynyń amfıteatrynda Qazaqstan óńirlerinen kelgen Ǵarıfolla Qurmanǵalıevtiń shákirtteri men basqa da ánshiler «Án - urpaqqa amanat» atty festıvalinde óz ónerlerin kórsetti.
Qaratóbe aýylynda ótken ІV respýblıkalyq «Jeztańdaı, kúmis kómeı án dúldúli» atty dástúrli ánshiler baıqaýyna elimiz óńirlerinen barlyǵy 22 úmitker qatysyp, baq synady.
Saıyskerler birinshi kezeńde Ǵarıfollanyń jáne Muhıttyń joǵary dıapazondy týyndylarynyń birin, oǵan qosa ár qatysýshy óz aımaǵynyń ánin oryndaýǵa tıisti boldy. Osydan súrinbeı ótken 12 ánshi ekinshi kezeńge joldama aldy.
Baıqaý qorytyndysynda Nur-Sultan qalasynan kelgen Aıdana Qarjaýbaeva bas júldeni jeńip aldy. Atyraýlyq Berik Amantaev birinshi, BQO-nyń Aqjaıyq aýdanynan Danııar Eleýov pen aqtaýlyq Nurym Asqanov ekinshi, aqtóbelik Ádilet Kúzembaev, syrymdyq Armat Aldamjarov, qaratóbelik Nurshat Islamǵalıev úshinshi orynǵa ıe boldy.
Beıbit Qajyǵalıev, Tilek Bazarov, Kenesary Mızamov, Juldyz Súndetqalıeva, Ázimhan Baımaǵambetov baıqaýdyń dıplomaty atandy.
Qazylar alqasynyń tóraǵasy, QR halyq ártisi Qajybek Bekbosyn sonaý Túrkistannan kelip, ustazyna arnalǵan óner merekesine qatysyp, saıysqa tórelik etkenine rıza ekendigin jetkizdi.
«Biz dástúrli ánderdi Ǵarekeńnen alyp qalsaq, aldaǵy ýaqytta da osyny jalǵastyratyn jastar bar ekendigine taǵy bir kýá boldyq. Ultymyz barda Ǵarekeńdeı uly ánshiniń murasy ólmek emes, qaıta jańǵyra túsetin bolady», - dedi Q.Bekbosyn.
Gala-kontsertte baıqaý jeńimpaz-júldegerlerimen qatar Ǵ.Qurmanǵalıevtiń shákirtteri Qajybek Bekbosyn, Haıdar Óteǵalıev, Qapash Qulysheva sahnaǵa shyǵyp, kórermenderdi bir jelpintip tastady. Al Atyraýdan kelgen Gúlmaıdan Súndetova Ǵarekeńe arnalǵan «Aǵany ańsaý» atty óz ánin oryndap berdi.
Respýblıkalyq dodaǵa qatysyp, júlde alǵan Danııar Eleýovtiń Ǵarıfollanyń ózi ustaǵan dombyramen án shyrqaýy da este qaldy.
