Ań, balyq aýlaýda qandaı qaýipsizdik sharalary bar
Demalystyń sáti túskende balyq aýlaýdy ádetke aınaldyrǵan er azamattar az emes. Olarǵa jyldyń qaı mezgilinde de ózen-kól jaǵasynda balyq aýlaý – ǵanıbet. Ań aýlaý maýsymyn da kútip júretinder barshylyq. Osy rette jeke bas qaýipsizdigi sharalaryna nazar aýdarǵan artyq bolmaıdy. Kazinform bul oraıda Qyzylorda oblysy Jalaǵash aýdany Tótenshe jaǵdaılar bóliminiń bastyǵy Erkin Nazarqulovty áńgimege tartqan edi.
– Balyq aýlaýǵa shyqqanda tosyn jaǵdaıǵa urynbaý úshin qandaı saqtyq sharalaryna nazar aýdarǵan jón?
– Kóldiń nemese ózenniń jaǵalaýynda balyq aýlaýǵa kiriser aldynda tańdalǵan jerdi muqııat qarap shyqqan artyq emes. Aıdynnyń qaýipsizdik dárejesi anyqtalýy qajet. Aldymen, jaǵadan úshkir tastardy, tikenekti butaqtardy jáne basqa da qaýip keltirýi múmkin zattardy alyp tastaǵan abzal. Sodan keıin balyq aýlaýǵa arnalǵan quraldardy oryn-ornyna qoıyp, qarmaqpen balyq aýlaǵanda kedergi keltirmeıtinine kóz jetkizse bolady. Qoparylǵan jáne tik jaǵalaýlarda erekshe saqtyq qajet. Sazdy jaǵalaýlar, ásirese, jańbyrdan keıin taıǵaq bolady. Sol sebepti sýǵa syrǵyp ketý qaýpi bar.
– Kóldiń nemese ózen ortasynda qaıyqpen balyq aýlaıtyndarǵa qandaı keńes berer edińiz?
– Eń bastysy, oqys jaǵdaı bola qalsa, júze bilý qajet ekenin esten shyǵarmaǵan abzal. Bul óz ómirin saqtap qalýǵa, tipti, eń qıyn, kútpegen jaǵdaıda qasyndaǵy adamdy qutqarýǵa kómektesedi. Sý aıdynyna shyǵar aldynda azamattar qaıyqtyń jaı-kúıin muqııat tekserip, eskektiń aqaýsyz ekenine kóz jetkizýi qajet. Balyq aýlaýǵa arnalǵan quraldardy qaıyqtyń janyna salyp qoıǵan artyq emes. Al basqa zattardy (kıimdi, sómkeni, dorbany) qaıyqtyń aldyńǵy jaǵyna jáne oryndyqtyń astyna ornalastyrǵan jón. Mindetti túrde qaıyqta qutqarý sheńberi nemese qutqarý keýdeshesi, sý jınaýǵa arnalǵan shelek nemese basqa da ydystar bolýy tıis.
– Al qys aılarynda ańshylyq jasaıtyn turǵyndar ne eskerýi qajet?
– Ańshylyq tek arnaıy ruqsat qujaty bar sharýashylyqtardyń aýmaǵynda júrgizilýi tıis. Árbir ańshynyń ań aýlaý erejesin, órt qaýipsizdigin qatań saqtaýy kerektigin eske salaıyn. Sýda júzetin qustar, sýmańy janýarlarynyń ózgeshe minez-qulyq tanytýy nemese jappaı qyrylýy baıqalsa, birden qoryq qyzmetine, bolmasa aýdandyq, oblystyq ańshylyq sharýashylyǵyna shuǵyl túrde habarlaý qajet. Óıtkeni qorshaǵan ortany qorǵaý – árbir azamattyń azamattyq boryshy.
Ań atýǵa ruqsat qaǵazdy ańshylyq sharýashylyqtary beredi jáne ózge sharýashylyqtardyń aýmaǵyna kirýge nemese merzimi aıaqtalǵan joldamamen ańshylyqqa shyǵýǵa, qujatty ózge tulǵalarǵa berýge tyıym salynady.
Taǵy bir eskere ketetin jaıt, tuıaqty janýarlardy atýǵa shyqqan kezde ańshylyq, sharýashylyq qoryqshysymen birge júrý – mindetti. Ań aýlaý tártibi týraly aqparatty ańshylar qoǵamynan jáne ańshylyq sharýashylyqtarynan alýǵa bolady.
– Áńgimeńizge raqmet.
