Án álemine silkinis ákelgen alaman
ASTANA. 24 qyrkúıek. QazAqparat - «Alǵash ret gollandııanyń RTL4 telearnasynda «The Voice of Holland» degen atpen jaryqqa shyqqan sheteldik jobanyń Qazaqstan Ulttyq arnasynda tusaýy kesiletin kún de alys emes»,
dep habarlady «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy.
Alaıda bul joba eýropalyq balamasynyń aına-qatesiz kóshirmesi emes. Onyń ózindik erekshelikteri men qazaqı reńi bar. Jobada ulttyq ándermen qatar sheteldik tanymal áýender bar. Qazaq daýysyn álemge tanytatyn úmitker kez kelgen sheteldik óner dodasyna saıysqa túsýge qabiletti ekenin kórsetýi qajet.
Alǵashqy irikteý kezeńinde tálimger úlken oryndyqta teris qarap otyryp, qatysýshynyń bet-álpetin kórmeı, tek jandy daýysyn estý arqyly irikteıdi. Nege? Óıtkeni telearnalarda daýysy bolmasa da jasandy daýyspen án salatyn ánshiler kóbeıip ketti. Bul joba taza daýys pen tabıǵı ún izdeıdi. Symbatty, myń buralǵan bıshi emes, kórikti kelbet emes, qazaq elin ózgelerge moıyndatatyn saf daýys ıesi ǵana oza shaýyp, bas syılyqty alýy tıis. Mega jobanyń negizgi ereksheligi - osy.
Joba tálimgerleri retinde elimizdiń tanymal ánshileri Nurlan Alban, Medeý Arynbaev, Mádına Sádýaqasova jáne Almas Kishkenbaev tańdap alyndy. Olar saz áleminde óz orny, tájirıbesi bar jandar. Tálimgerler úmitkerlerge nusqaý berýshi, jol silteýshi ǵana emes, ónerpazdarmen birigip jumys isteıdi. Eger joba barysynda qatysýshynyń óneri osal bolsa, tálimger úmitkerdi baıqaýdan shettete alady.
Tabıǵat bergen darynyna arqa súıep, baǵyna sengen úmitkerler elimizdiń iri qalalarynda ótken irikteýlerge qatysty. Baıqaýǵa on myńǵa jýyq adam qatysyp, eń úzdik úmitkerdi úlken sahnaǵa shyǵarady. Qatysýǵa nıet bildirgenderdiń uzyn-sonar kezegine qarap, tuńǵysh ret ótkizilip otyrǵan bul jobanyń án salýǵa qabiletti jannyń bárin eleń etkizgenin anyq baıqaýǵa bolady. Máselen bir ǵana Almaty qalasynyń ózinde úsh myńǵa jýyq qatysýshy baq synaýǵa ótinish berdi. Onyń ishinde án álemine jańa qadam basqandarmen qatar sahna tarlandary da bar. Joba talaby zor bolǵandyqtan irikteý syny joǵary deńgeıde ótti. Toǵyz myńnan asa úmitkerdiń eki júzge jýyǵy ǵana aıtýly jobaǵa qatysýǵa múmkindik aldy. Olar kimder? Júzden júırik shyqqan qandaı baqytty jandar eken? Qazir qazaq kórermenin alańdatyp otyrǵan basty másele osy. Joba qyrkúıek aıynyń 29 kúni, saǵat 21.35-te Ulttyq arnadan kórsetiledi.
