«An-2P» ushaq apatyna qatysty áýe kompanııasynyń dırektory kúdikti retinde tanyldy - Prokýratýra
ASTANA. QazAqparat - 2015 jyldyń 20 qańtarynda Jambyl oblysynda qulaǵan An-2P apatyna qatysty «OLIMP AIR» JShS áýe kompanııasynyń dırektory kúdikti retinde tanylǵan. Bul týraly aqparatty QR Bas kólik prokýratýrasy taratyp otyr.
Kólik prokýratýrasynyń habarlaýynsha, apattyń ekinshi sebebi, áýe kompanııasynyń ushý qaýipsizdigin qamtý boıynsha tıisti jumystardy oryndamaýy. Buǵan deıin habarlaǵanymyzdaı, apattyń birinshi sebebi - ekıpajdyń teris áreketteri. «Іs boıynsha jınalǵan málimetter apattyń ekinshi sebebi - áýe kompanııasynyń ushý qaýipsizdigin qamtý boıynsha tıisti jumystardy durys uıymdastyrmaýy. Bul jumystarǵa jaýapty - áýe kompanııasynyń dırektory laýazymyndaǵy adam. Apat bolǵan kúni ekıpaj áýege zańsyz ushyrylǵan, sebebi, ekıpaj músheleriniń biri resmı túrde ushý quqyǵynan aıyrylǵan bolatyn, ıaǵnı, áýe kemesiniń túri men reıtıngisi boıynsha bir ekıpaj múshesiniń ushý quqyǵynyń merzimi aıaqtalǵan. Budan basqa, áýe kompanııasynyń dırektory tártip buzyp, eki ushqyshtyń jyl saıyn medıtsınalyq tekserýden ótýine jáne mindetti túrde dene shynyqtyrý daıyndyǵynan ótýine jaǵdaı jasamaǵan. Sonymen qatar, aerodrom men qoný alańdaryn esepteý jónindegi erejeler buzylyp, áýe kompanııasy «Shatyrkól» kenishi aýdanynda qaýipsiz ushý úshin ushqyshtarǵa kerek nusqaýlyq (baǵdar, otyrý nusqalary jáne t.b.) ázirlemegen», - dep habarlady Kólik prokýratýrasy. «Áýe kompanııasynyń basshylyǵy tarapynan ushý qyzmetine tıisti qadaǵalaý júrgizilmegenin Komıssııanyń qorytyndy esebi rastap otyr. Sondyqtan, ushaqty paıdalaný jáne ushyrý qaýipsizdigin (QK 344 babynyń 3 bóligi) buzǵany úshin, sondaı-aq, abaısyzda eki nemese odan da kóp adamnyń ólimine ákep soqqan áýe kóligin basqarýǵa quqyǵy joq adamnyń osy kemeni basqarýyna jol bergeni (QK 359 babynyń 4 bóligi) úshin áýekompanııa dırektory kúdikti retinde tanyldy. 2015 jyldyń 25 qarashasynda QR QPK-niń 305-babyna sáıkes ol sotqa berilip, qylmystyq is Jambyl oblysy Shý aýdandyq sotyna qaraýǵa joldandy»,-dep habarlaıdy Kólik prokýratýrasy.
