AN-2 ushaǵy apatynan zardap shekken Shaıahmetovaǵa úsh ota jasalady - dáriger
ASTANA. QazAqparat - 20-qańtar kúni Jambyl oblysynda qulaǵan AN-2 ushaǵynyń jolaýshysy Ásem Shaıahmetovaǵa Astanada úsh ota jasalady. Bul týraly búgin Astanadaǵy nómiri 1-shi qalalyq aýrýhanasy bas dárigeriniń mindetin atqarýshy Ersin Júnisov málim etti.
"Naýqas jan saqtaý bóliminde jatyr. Aýrýhanamyzda jaraqattar jáne ortohırýrgııa ortalyǵy bar. Qazir osy ortalyq mamandary men jan saqtaý bóliminiń mamandary birlese, naýqasqa kóptegen jaraqattar boıynsha hattamalar júrgizip jatyr. Ol jaraqattar bar ma, joq pa, olarǵa qaramastan biz kompıýterlik tomografııa arqyly basqa organdaryn tekserip jatyrmyz. ıAǵnı, osynda kelip túskendegi dıagnozy men qazirgi dıagnozynyń dáldigin anyqtaý maqsatynda kompıýterlik tomografııa kerek bolyp otyr", - dep túsindirdi E.Júnisov.
"Naýqas kóptegen jaraqattar alǵan. Qazir "sol jaq san súıeginiń ortańǵy úshten bir bóliginiń ashyq synyǵy, oń jaq sıraq súıeginiń tórtinshi dárejeli ashyq synyǵy, bas mıynyń jaraqaty, bas mıynyń shaıqalýy" degen dıagnoz qoıylyp otyr. Ampýtantsııa jasalady degen boljam joq. Qazir osyndaı qıyn jaraqattardy emdeýdiń jańa joldary bar. Qazaqstanǵa sońǵy 10-15 jyldar osyndaı tujyrym engizilgen. Naqtyraq túsindirsem, naýqas qatty jaraqatpen túsken kezde oǵan turaqtandyrý apparattary qoldanylady. Sodan keıin, qarqyndy emdeý ádisterin qoldanyp, jaǵdaıy jaqsy bolǵan kezde, onyń ómirine qaýip tónedi degen kúmán bolmaǵan kezde, emdeýdiń ekinshi kezeńi retinde 5-7 kún aralyǵynda turaqty emdeýge aýysamyz. Odan keıin jasalatyn operatsııalar naýqastyń basqa organdaryna zaqymyn tıgizbeýi kerek. Sondyqtan, eýropalyq, amerıkandyq quraldardy qoldana otyryp, jabyq ostosıntez operatsııalary jasalady. Ásemge endi úsh operatsııa jasaımyz. Óıtkeni úsh súıegi synǵan, sol úsh súıekti jınaý úshin úsh operatsııa kerek", - dep atap ótti dáriger.
Aıta keteıik, búgin tańerteń Ásem Astanaǵa jetkizilgen bolatyn.
20 qańtarda Jambyl oblysy Shý aýdanynda Balqash-Shatyrkól baǵytyna bet alǵan «Olımp-Eır» kompanııasynyń AN-2 ushaǵy apatqa ushyraǵan. Sonyń ishinde «Qazaqmys» korporatsııasynyń «Balqashtústi metall» geology Ásem Shaıahmetova da bolǵan edi. Apattan keıin ol dereý «112» telefony arqyly qutqarý qyzmetine habarlasyp úlgergen. Oqıǵa ornyna kelgen Jambyl oblysy TJD jedel den qoıý brıgadasy áýe apatynan jalǵyz aman qalǵan jolaýshyny Shý qalasyndaǵy Ortalyq aýdandyq aýrýhanaǵa jetkizdi.
