An-148 ushaǵy apatynyń yqtımal sebepteri aıtyldy
ASTANA. QazAqparat - Máskeý mańynda An-148 ushaǵynyń apatqa ushyraýyna jylytý júıeleri óshirilgende datchıkterdiń muz bolyp qatýyna baılanysty ushý jyldamdyǵy týraly durys aqparattyń berilmeýi sebep bolýy múmkin. Bul týraly Reseıdiń Memleketaralyq avıatsııalyq komıtet (MAK) borttyq parametrlik jazý qurylǵysyndaǵy derekterdi ashqan soń málimdedi, dep jazdy TASS agenttigi.
«Jazý quralyndaǵy ózge ushýlarda (15 ushý) tolyq qysymdy qabyldaǵysh ushý aldynda qosylyp kelgen», - delingen MAK habarlamasynda.
Kókke kóterilgen An-148 alty mınýttan soń apatqa ushyraǵan. MAK 130-150 metr bıiktikte avtopılottyń qosýly bolǵanyn atap ótti. Shamamen 2 mınýt 30 sekýndtan soń, 1300 metr bıiktikte jáne 465-470 km/saǵat jyldamdyqta bortta erekshe jaǵdaı oryn alǵan. An-148 ózdiginen jazý quraldary jyldamdyq datchıkteriniń kórsetkishteri arasyndaǵy alshaqtyqtardy tirkegen. Taǵy 30 sekýndtan keıin aradaǵy aıyrmashylyq 30 km/saǵatqa jetken jáne ekıpajǵa «Prıbornaıa - sravnı» komandasy berilgen. Komanda 2000 metr bıiktikte taǵy qaıtalanǵan, bul joly datchıkterdiń kórsetkishteri arasyndaǵy aıyrmashylyq ulǵaıa túsken.
Ekinshi «Prıbornaıa - sravnı» komandasynan keıin ekıpaj avtopılotty óshirgen. Ári qaraı ushý qolmen basqarý rejıminde júrgizilgen. Jyldamdyq kórsetkishteri kúrt alshaqtap ketken: bir tetik 0 km/saǵatty, ekinshisi - 540-560 km/saǵatty kórsetken. Sodan keıin jyldamdyq kórsetkishteri tómendegen (200 km/saǵatqa deıin jáne tómen), ushaq 30-35 gradýs buryshtyq qozǵalyspen qarqyndy tómendeýge aýystyryldy. Jermen soqtyǵysar kezde modýlderdiń birindegi jyldamdyq kórsetkishteri nóldi, ekinshisi 800 km/saǵatty kórsetken.
«Soqtyǵysýdan 4-5 sekýnd buryn ushaq oń jaqqa 25 gradýsqa aýǵan», - dep habarlady MAK.
Alynǵan málimetterge saraptama jumystary áli de jalǵasady.
Buǵan deıin habarlaǵanymyzdaı, Máskeýdiń Domodedovo áýejaıynan kókke kóterilgen An-148 jolaýshylar ushaǵy kóp uzamaı radardan joǵalyp ketti. Keıin ushaq qaldyqtary Máskeý oblysynyń Ramensk aýdanynda tabylǵany málim etildi. «Saratov áýe jelileri» kompanııasyna tıesili ushaqtyń bortynda 65 jolaýshy men 6 ekıpaj múshesi boldy. Olardyń barlyǵy ajal qushty.
