Amýr oblysynda Tý-95 ushaǵy apatqa ushyrap, alty áskerı qaza tapty
MÁSKEÝ.KAZINFORM - Reseıdiń Amýr oblysynda Tý-95 áskerı ushaǵy apatqa ushyrap, ekıpajdyń alty múshesi qaza tapty, taǵy bir adam jaraqat alyp, aýrýhanaǵa jetkizildi, dep habarlaıdy agenttik tilshisi.
Reseı Qorǵanys mınıstrliginiń málimetinshe, ushaq oqý-jattyǵý ushýyn oryndaǵan jáne Krasnoıarovo aýyly mańyndaǵy adam turmaıtyn jerde apatqa ushyraǵan. Bortta ekıpajdyń jeti múshesi bolǵan. Ushaq oq-dárisiz ushqan.
«Aldyn ala málimet boıynsha, ekıpajdyń alty múshesi qaza tapty, bireýi jaraqat alyp, medıtsınalyq mekemege evakýatsııalandy», — dep habarlady Reseıdiń áskerı vedomstvosy.
Amýr oblysynyń úkimeti ekıpaj ushaqty turǵyn úılerden alystatý úshin qoldan kelgenniń bárin jasaǵanyn málimdedi.
Apattan keıin oqıǵa ornynda kúshti órt shyqty. Áleýmettik jelilerde ushaqtyń qulaýynan keıingi jaǵdaı túsirilgen beınejazbalar paıda boldy. Alaıda apattyń mán-jaıy anyqtalyp jatyr.
Oqıǵanyń barlyq mán-jaıyn anyqtaý úshin apat ornyna Reseıdiń Áýe-ǵarysh kúshteriniń komıssııasy jiberildi. Reseılik BAQ-tyń habarlaýynsha, apattyń sebepterine qatysty túrli nusqalar qarastyrylyp jatyr. Alaıda ázirge onyń naqty sebebi resmı túrde jarııalanǵan joq.
Tý-95MS strategııalyq zymyran tasymaldaýshy ushaqtarǵa jatady jáne alys qashyqtyqqa ushatyn qanatty zymyrandardy tasymaldaýshy bolyp sanalady. Birikken avıatsııa korporatsııasynyń málimetinshe, bazalyq Tý-95 ushaǵy alǵash ret 1952 jyly áýege kóterilgen, al Tý-95MS qazirgi ýaqytta jańǵyrtýdan ótip jatyr.
