Amsterdamda «Sınaloa» esirtki karteliniń kóshbasshysy qolǵa tústi
ASTANA. 4 qańtar. QazAqparat - Amsterdamdaǵy Shınpol áýejaıynda meksıkalyq «Sınaloa» esirtki karteli basshylarynyń biri Hose Rodrıgo Arechıga-Gamboa (Jose Rodrigo Arechiga-Gamboa) ustaldy. Bul týraly Agence France-Presse-ke silteme jasap, lenta.ru habarlady.
Arechıga-Gamboa Amsterdamǵa Mehıkodan jalǵan qujatpen ushyp kelgen. Qazir ol nıderland túrmesinde, alaıda ol AQSh-qa ekstradıtsııalanýy múmkin.
Arechıga-Gamboany ustaýǵa order 2013 jyldyń 20 jeltoqsanynda amerıkalyq Kalıfornııa shtatynyń San-Dıego qalasynyń sotymen berilgen bolatyn. Oǵan metamfetamınder, kokaın jáne marıhýanany satý jáne taratý aıyptary taǵylyp otyr.
Associated Press-tiń habarlaýynsha, Arechıga-Gamboa karteldegi negizgi «ınforser» bolǵan kórinedi. Onyń mindetine qylmystyq toptyń talaptarynyń oryndalýyn qadaǵalaý kirgen.
Meksıkanyń Sınaloa shtatyndaǵy «Sınaloa» esirtki karteli álemdegi eń myqty qylmystyq toptardyń biri bolyp sanalady. Uıymnyń negizgi basshysy retinde Hoakına Gýsman atalady. Ol AQSh-taǵy eń kóp izdestirilýdegi narkobaron bolyp tabylady. Onyń jasyrynǵan jeri týraly aqparat bergen adamǵa amerıkan úkimeti 5 mln. dollar syıaqy daıyndap otyr.
