Amsterdamda klımatqa keri áser etetin ónimderdi jarnamalaýǵa tyıym salyndy

ASTANA. KAZINFORM — Amsterdamda klımatqa zııan keltiretin taýarlardyń syrtqy jarnamasyna tyıym salynady.

Bul shara et pen ony qamtıtyn ónimderge — gambýrger sııaqty taǵamdarǵa, sondaı-aq qazba otyny men ony paıdalanatyn taýarlar men qyzmetterge, mysaly dızeldi kólikter men áýe tasymalyna qatysty.

Olardy jazǵy maýsymnan bastap kóshedegi bılbordtar men avtobýstar aıaldamalarynda jarnamalaý tyıym salynatyn bolady. Qalalyq keńes bul sharany kópshilik daýys boıynsha maquldady.

Nıderlandynyń «jasyldar» partııasy GroenLinks, osy bastamanyń avtorlarynyń biri, bul sheshimdi «klımat pen qoǵamdyq densaýlyq úshin úlken jeńis» dep atady.

Buǵan deıin Nıderlandynyń keıbir basqa qalalarynda — Harlem, Neımegen jáne Ýtrehtte osyndaı tyıymdar engizilgen. 

Ótken jyly Gaaga soty týroperatorlardyń jarnamalyq tyıymǵa qarsy bergen shaǵymyn qanaǵattandyrmady.

Alaıda klımatqa zııan keltiretin taýarlardy Nıderlandyda ınternette, teledıdarda nemese sýpermarketterde jarnamalaý áli de múmkin.