Amsterdam áýejaıynda ushaq qozǵaltqyshy tartyp áketken er adam kóz jumdy

ASTANA. KAZINFORM – Amsterdamnyń «Shıphol» áýejaıynda KLM Cityhopper jolaýshylar ushaǵynyń jumys istep turǵan qozǵaltqyshyna tartylyp qalǵan er adam qaıtys boldy, dep habarlaıdy VVS. 

Oqıǵa sársenbi kúni tústen keıin Embraer E190 ushaǵy ushýǵa daıyndalyp jatqan kezde bolǵan. Ol Danııanyń Bıllýnn qalasyna KL1341 reısin oryndaýy tıis edi.

Nıderlandtyń NOS qoǵamdyq habar taratýshysy jarııalaǵan kadrlarǵa qaraǵanda oqıǵa termınal janyndaǵy perronda bolǵan.

Oqıǵa ornynan túsirilgen sýretterde ushaqtyń qasynda órt sóndirý kólikteri men tótenshe jaǵdaılar qyzmetkerleri kórsetilgen.

«Búgin „Shıpholda“ oqıǵa boldy, sonyń saldarynan adam jumys istep turǵan ushaq qozǵaltqyshyna tartylyp qalǵan. Ókinishke qaraı, ol qaıtys boldy. Qazirgi kezde biz oqıqaǵa kýá bolǵan jolaýshylar men qyzmetkerlerge qamqorlyq jasap otyrmyz», — delingen KLM habarlamasynda.

Áýejaıdaǵy qaýipsizdikke jaýapty Nıderlandtyń koroldik áskerı polıtsııasy jolaýshylardyń ushaqtan shyǵarylǵanyn, al bılik tergeýdi bastaǵanyn habarlady.

Qaza bolǵan adamnyń kim ekeni áli anyqtalǵan joq.

Áleýmettik jelilerde onyń jerústi qyzmetiniń qyzmetkeri bolýy múmkin ekeni jazylǵan, biraq Algemeen Dagblad (AD) basylymynyń derekkózderi bul aqparat shyndyqqa janaspaıtynyn jáne er adam kútpegen jerden qozǵaltqyshtyń qasynda qalǵanyn habarlady.

Flightradar24 qyzmetiniń málimetinshe, KL1341 reısin basqa ushaq oryndaǵan, ol alty saǵat keshigip ushyp, Bıllýnǵa saǵat 21:23–te qonǵan.

AD málimetinshe, ushýdy rezervtegi ekıpaj júzege asyrǵan. Danııaǵa kelgennen keıin jolaýshylarǵa psıhologııalyq kómek kórsetildi.

«Shıphol» — álemdegi eń úlken áýejaılardyń biri. Bıylǵy sáýir aıynda ǵana ol 5,5 mln-ǵa jýyq jolaýshyǵa qyzmet kórsetti.

Áýejaıda qatań qaýipsizdik sharalary saqtalǵan, munda apattar óte sırek kezdesedi, dep atap ótti AFP.