ÁMSQ Jambyl oblysy medıtsına qyzmetkerlerimen áleýmettik aýdarymdy keshiktirý máselesin talqylady
ASTANA. KAZINFORM – Áleýmettik medıtsınalyq saqtandyrý qorynyń ókilderi Merki kópsalaly ortalyq aýdandyq aýrýhanasynyń ujymymen kezdesip, zeınetaqy tólemderiniń keshigýine qor sebep emes ekenin baıandady, dep habarlaıdy Kazinform menshikti tilshisi.
Eske sala ketsek, ótken aptada Merki KOAA-da jumyskerlerdiń shotyna alty aıdan astam ýaqyt boıy zeınetaqy aýdarymdary túspegeni týraly habarlaǵan bolatynbyz. Aýrýhana tólemderdiń joqtyǵyn rastady, biraq 2025 jyldyń tek eki aıynda túspegeni aıtylyp, ÁMSQ tarapynan tólemderdiń joqtyǵymen túsindirdi. Qor resmı málimdeme jarııalap, onda aýrýhana barlyq tıisti tólemdi ýaqytynda alǵany aıtylǵan.
QR Densaýlyq saqtaý mınıstri men ÁMSQ Basqarma tóraǵasynyń tapsyrmasymen qordyń ortalyq apparaty ókilderinen quralǵan delegatsııa Merki kópsalaly ortalyq aýdandyq aýrýhanasyna bardy. Medıtsınalyq mekeme ujymymen ótken kezdesýge sondaı-aq oblystyq densaýlyq saqtaý basqarmasy men aýdan ákimdiginiń ókilderi qatysty.
Merki aýdany ákiminiń orynbasary Ómirbek Meıirhan aýdandyq ortalyq aýrýhananyń búgingi jaǵdaıyna toqtaldy. Ol ákimdiktiń medıtsınalyq uıym ishindegi menedjment, josparlaý jáne basqarý máselelerine qatysty suraqtar bar ekenin atap ótti.
Aýrýhana basshysynyń m.a. Anelıa Muhaeva ÁMSQ-dan medıtsınalyq qyzmetterge tólemder ýaqytyly túskenin jáne bul qarajat birinshi kezekte qyzmetkerlerdiń jalaqysyn tóleýge jumsalǵanyn rastady. Onyń aıtýynsha, jalaqy zańmen belgilengen merzimde – kelesi aıdyń 10-na deıin tólengen.
Óz kezeginde ÁMSQK Jambyl oblysy boıynsha fılıalynyń dırektory Ǵaını Aımaǵanbetova medıtsınalyq qyzmetterdi satyp alý kelisimsharty, tólemderdiń jalpy somasy jáne tranzaktsııalardyń jıiligi týraly egjeı-tegjeıli baıandap berdi. Ujymǵa aýrýhana shottaryna aýdarylǵan naqty soma jáne onyń qashan túskeni aıtyldy.
Kezdesý sońynda aýrýhana basshylyǵy tólemder boıynsha budan bylaı keshigý bolmaıtynyn atap ótti.
Qor qosymsha baqylaý sharasyn engizýdi usynǵanyn da aıta ketken jón. Protsesterdiń ashyqtyǵyn qamtamasyz etý maqsatynda qor fılıaly Merki KOAA-ny pılottyq rejımde «1S: Býhgaltııa» aqparattyq júıesine ıntegratsııalaýdy bastady. Mamandardyń aıtýynsha, bul medıtsınalyq mekeme qyzmetkerleriniń jalaqysy men áleýmettik tólemderiniń ýaqytyly tólenýin baqylaýdy qamtamasyz etedi.
Buǵan deıin Jambyl oblysynda balabaqsha basshylyǵy bıýdjetten 45,2 mln teńge jymqyrǵanyn jazǵan bolatynbyz.