ÁMSQ-nyń 2024 jylǵy komıssııalyq syıaqysy ulǵaıtylmaq
ASTANA. KAZINFORM — Áleýmettik medıtsınalyq saqtandyrý qorynyń komıssııalyq syıaqy paıyzdyq mólsherlemesiniń shekti shamasy ózgermek. Tıisti buıryq Ashyq NQA portalynda jarııalandy.
«Qordyń 2024 jylǵa arnalǵan qyzmetin júzege asyrýǵa Qazaqstan Respýblıkasynyń Úkimeti belgilegen shekti shama sheńberinde «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń komıssııalyq syıaqy paıyzdyq mólsherlemesiniń shekti shamasy esepti aıda qordyń shotyna túsken aktıvter mólsheriniń 1,60 paıyzy belgilensin», — delingen qujatta.
Qujat negizdemesinde jazylǵandaı, 2024 jylǵa arnalǵan MÁMS-ke jarnalar men aýdarymdar túsimderiniń boljamy aǵymdaǵy jyly Áleýmettik medıtsınalyq saqtandyrý qoryna (ÁMSQ) «Mindetti áleýmettik medıtsınalyq saqtandyrý týraly» QR Zańynda aıqyndalǵan jarnalar tóleýden bosatylǵan QR azamattary úshin MÁMS-ke memleket jarnalarynyń túspeýi sebebinen 1 456 277 930 myń teńgeden (bastapqy naqty boljam) 1 090 648 627 myń teńgege (pessımıstik boljam) deıin azaıady.
Máselen, 2024 jylǵa arnalǵan memleket jarnalary boıynsha jospar — 541 276 690 myń teńge, bıylǵy qańtar-mamyr aılarynda ÁMSQ-ǵa 190 712 776 myń teńge somasynda memleket jarnalary aýdaryldy.
«2024 jyly memleket jarnalarynyń túspeý boljamy 310 967 947 myń teńgeni quraıdy. Osyǵan baılanysty, bıyl jyl sońyna deıin qordyń 2024 jyly 3 062 156 myń teńge somasyna «kassalyq alshaqtyq» jáne tıimsiz qordyń mindettemelerin tólemeý táýekelderi týyndaıdy. Máselen, bıylǵy jylǵy 25 qarashadaǵy jaǵdaı boıynsha Qordyń 2024 jylǵa arnalǵan Damý jospary boıynsha oryndalmaǵan mindettemeler somasy 3 656 755 mln teńgeni quraıdy», — delingen talqylaýǵa shyǵarylǵan buıryq jobasynda.
ÁMSQ-nyń qarjylyq ornyqtylyǵyn qamtamasyz etý maqsatynda densaýlyq saqtaý sýbektilerin qarjylandyrý boıynsha onyń strategııalyq mindetterin iske asyrý úshin memlekettiń bıyl maýsymnan bastap MÁMS-ke jarnalardy aýdarý jónindegi mindettemelerdi oryndamaýyna baılanysty 2024 jylǵa arnalǵan ÁMSQ komıssııalyq syıaqysynyń paıyzdyq mólsherlemesiniń shekti shamasyn 2024 jylǵy 1 maýsymnan 31 jeltoqsanǵa deıin 1,18%-dan 1,60-ǵa deıin ulǵaıtý usynylady.
Eske salsaq, budan buryn Áleýmettik medıtsınalyq saqtandyrý qory 2,4 trln teńgege medıtsınalyq qyzmetter satyp alatyny habarlandy.