«ÁMSQ» KEAQ Basqarma tóraǵasynyń orynbasary 400 mln teńge urlady degen kúdikke ilindi

ASTANA. KAZINFORM – Sybaılas jemqorlyqqa qarsy is-qımyl agenttigi málimetinshe, densaýlyq saqtaý júıesi sybaılas jemqorlyq táýekelderine eń osal bolyp qala beredi jáne qoǵamnyń erekshe nazarynda.

Sońǵy úsh jylda bul salada 134 qylmystyq quqyq buzýshylyq tirkelgen. Olar boıynsha 57 adam sottaldy. Laýazymdy tulǵalardyń zańsyz áreketteri azamattardyń senimine nuqsan keltirip qana qoımaı, medıtsınalyq qyzmetterdiń tıimdiliginiń tómendeýine jáne memlekettik qarajattyń maqsatsyz jumsalýyna ákeledi.

Osy jyldyń maýsym aıynda Ortalyq organnyń jáne onyń Shyǵys Qazaqstan oblysy boıynsha fılıalynyń joǵary laýazymdy tulǵalarynyń qatysýymen sybaılas jemqorlyq shemasy ashyldy. Osylaısha, «Áleýmettik medıtsınalyq saqtandyrý qory» KEAQ Basqarma tóraǵasynyń orynbasary áshkerelendi.

Ol densaýlyq saqtaý sýbektisine halyqqa medıtsınalyq qyzmet kórsetý úshin bólingen 400 mln teńgeden astam qarajatty júıeli túrde urlady degen kúdikke ilindi.

Jymqyrý medıtsınalyq uıymnyń «Damumed» aqparattyq júıesine mindetti áleýmettik medıtsınalyq saqtandyrý sheńberinde Óskemen qalasynyń turǵyndaryna kórsetilgen qyzmetter týraly kórineý jalǵan málimetter engizý jolymen jasaldy. Іs júzinde medıtsınalyq qyzmetter kórsetilmedi, otyz myńnan astam «tirkeý» anyqtaldy.

Sonymen qatar ol jeke medıtsınalyq mekemeniń kásipkerlik qyzmetine zańsyz qatysyp, Qordyń jymqyrǵan qarajatyn, onyń ishinde qymbat múlikti satyp alý arqyly zańdastyrdy dep kúdiktenedi. Kúdikti sottyń sanktsııasymen qamaýǵa alyndy.

Tergeý jalǵasyp jatyr, sheneýnik pen basqa adamdardyń basqa qylmystyq epızodtarǵa qatysýy tekseriledi.

Qylmystyq is júrgizý kodeksiniń 201-babyna sáıkes tergeý múddesinde ózge de aqparat jarııa etilýge jatpaıdy.

Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.

– Eger siz ózińizdiń kelisimińizsiz medıtsınalyq qyzmet kórsetý úshin derbes derekterdi zańsyz paıdalaný týraly bilseńiz, bul týraly 1424 nómiri boıynsha «Call-ortalyqqa» habarlaýyńyzdy suraımyz, - delingen habarlamada.

Áleýmettik medıtsınalyq saqtandyrý qory basshysynyń orynbasaryna qatysty is tergelip jatqanyn jazǵan bolatynbyz.