ÁMSQ: Emhanaǵa erkin tirkelý naýqany 15 qarashada aıaqtalady
Konsýltatsııalyq-dıagnostıkalyq qyzmetter boıynsha klınıkany óz qalaýyńmen tańdaýǵa bola ma? Óz quqyǵyńyzdy qalaı qorǵaı alasyz?... Turǵyndar tarapynan jıi qoıylatyn osy tektes saýaldarǵa Áleýmettik medıtsınalyq saqtandyrý qory elorda fılıalynyń aqparattandyrý bóliminiń bas sarapshysy Janargúl Úmbetova jaýap berdi, dep habarlaıdy Kazinform.
Dıagnostıkalyq qyzmetterdi nemese salalyq mamandardyń keńesterin óz emhanańyzdan basqa jerde alýǵa bola ma?
Emhanany erkin tańdaý quqyǵyn birneshe jaǵdaıda ǵana paıdalanýǵa bolady:
— eger bekitilgen jeri boıynsha emhanada qajetti maman bolmasa nemese oǵan jazylý múmkin bolmasa, al kezekti kútý uzaq ýaqytqa sozylatyn jaǵdaıda (10 kúnnen artyq).
— eger patsıent óziniń syrqaty týraly belgili bir dárigerge qaralýǵa daǵdylanǵan bolsa nemese jaqyn adamdary usynǵan klınıkaǵa joldama berýdi talap etse (tek aldymen, ol klınıka Áleýmettik medıtsınalyq saqtandyrý qorynyń jetkizýshisi me, sony tizimnen anyqtap alǵan jón. Jetkizýshilerdiń tizimin fms.kz resmı saıtynan https://fms.kz/kz/zakupki/postavshchiki-kdu-uslug/ siltemesi arqyly qarap alýǵa bolady nemese klınıkanyń ózinen suraý kerek).
Erkin tańdaý boıynsha dıagnostıkalyq qyzmetterdi nemese salalyq mamannyń keńesin qalaı alýǵa bolady?
— patsıent óziniń ýchaskelik dárigerine júginedi
— basqa emhanaǵa joldama alady
— sol jerge dárigerdiń qabyldaýyna jazylady
— dáriger qabyldaýynda bolady nemese tekserýden ótedi.
Ýchaskelik dárigerdiń joldamasynsyz qandaı medıtsınalyq qyzmetterdi alýǵa bolady?
— eger patsıentte kúte almaıtyn shuǵyl jaǵdaı nemese jaraqat bolsa
— eger patsıent stomatologııalyq kómekke júginse (josparly nemese shuǵyl)
— patsıent teri-venerolog mamanǵa júgingen kezde
— eger patsıent onkologııalyq nemese gematologııalyq aýrýǵa kúdik týyndaǵan jaǵdaıda tar beıindi mamanǵa júginse
— patsıent tirkelgen jeri boıynsha gınekologqa nemese psıhologqa júginse
— eger patsıent Jastar densaýlyǵy ortalyǵyna júginse
— patsıent dárigerge qaıta júgingen kezde nemese qaterli isikke kúdiktense
— eger patsıent óz syrqatyn dınamıkalyq baqylaý úshin salalyq medıtsınalyq ortalyqqa júginse
— medıtsınalyq poezdarda nemese jyljymaly medıtsınalyq keshenderde medıtsınalyq qyzmetter alý kezinde.
— Atalǵan jaǵdaılardyń barlyǵynda patsıent medıtsınalyq kómek alǵysy keletin klınıkaǵa óz betinshe jazylady jáne belgilengen ýaqytta dárigerdiń qabyldaýyna keledi.
Qandaı jaǵdaılarda patsıentterge basqa emhanalarǵa joldama berilmeıdi?
— eger patsıentke qajetti qyzmetterdi óz ýchaskesiniń kórsetý múmkindigi bolsa.
— Mysaly, psıholog, ýchaskelik dáriger, medbıke, akýsherdiń qabyldaýy, patronaj, aktıv, ımmýndaý, profılaktıka, SÓS, bosanýǵa daıyndyq mektebi, keıbir dıagnostıkalyq zertteýler jáne basqa da qyzmetter.
Óz quqyǵyńyzdy qalaı qorǵaı alasyz?
Eger siz:
— kórsetilgen medıtsınalyq qyzmetterdiń sapasyna qanaǵattanbasańyz
— medıtsınalyq personal tarapynan dóreki qarym-qatynas bolsa
— tegin medıtsınalyq kómektiń kepildik berilgen kólemi sheńberinde jáne mindetti áleýmettik medıtsınalyq saqtandyrý júıesinde usynylatyn medıtsınalyq qyzmetter úshin aqshalaı qarajatty talap etý faktilerine
— nemese basqa da problemalyq máselelerge tap bolsańyz,
Siz:
— Patsıentterdi qoldaý jáne ishki aýdıt qyzmetinen kómek suraı alasyz. Mundaı qyzmet árbir medıtsınalyq uıymda jumys isteıdi. Keri baılanys úshin derekterin kórsete otyryp, jazbasha ótinish jazý jetkilikti. Tolyǵyraq aqparatty emhananyń nemese aýrýhananyń qabyldaý bóliminen bilýge bolady.
— Eger qoldaý qyzmeti bul máseleni «osynda jáne qazir» qaǵıdaty boıynsha sheshe almasa nemese shaǵymdarǵa jaýap bermese, patsıentter óz quqyqtaryn qorǵaý úshin fms.kz resmı saı̆ty, 1414 baı̆lanys ortalyǵy, Qoldau 24/7 mobıldi qosymshasy, Saqtandyrybot telegramboty sekildi keri baılanystyń resmı arnalary arqyly Medıtsınalyq saqtandyrý qoryna júginýge quqyly.
Sondaı-aq, jyl saıyn eki aı boıy ótkiziletin, 15 qyrkúıekte bastalǵan emhanaǵa erkin tirkelý naýqany 15 qarashada aıaqtalatynyn esterińizge salamyz.