Ámir Temirdiń Ulytaýdan tabylǵan 11 tonnalyq tańbaly tasy Ermıtaj murajaıynda saqtaýly tur
TAShKENT. KAZINFORM - Sankt-Peterbýrgtegi álemge áıgili Ermıtaj murajaıynda Ámir Temir dáýirinen qalǵan salmaǵy 11,2 tonnalyq tańbaly tas saqtaýly tur. Bul eskertkish 1937 jyly Ortalyq Qazaqstannyń Ulytaý óńirinen tabylǵan, dep habarlaıdy Kazinform agenttigi ÓzA-ǵa silteme jasap.
Jazbada Saıypqyrannyń Deshti Qypshaqqa jasaǵan joryǵy týraly jazba bar. Onda Temirdiń 1391 jyly 200 000 sarbazymen Toqtamys hanǵa jasaǵan joryǵy eske alynady.
- Qaıyrymdy, meıirimdi Allanyń atymen bastaımyn! Ómirdi jáne ólimdi berýshi de danamyz! Tarıhtyń jeti júz toqsan birinshi qoı jyly, jazdyń ara (shilde) aıy Turannyń sultany Temir bek eki júz myń áskermen Altyn Ordanyń hany Toqtamysqa qarsy soǵyspaqqa júrdi. Bul jerden ótip bara jatyp belgi bolsyn dep qorǵan turǵyzyp, jazý qaldyrdy. Táńirim násip bersin! Táńirim el adamdaryna raqym qylsyn! Olar bizge duǵa arnap, eske alsyn! Ámın! Turannyń sultany Temir bek, - delingen mátinde.
Eskertkish Ámir Temir áskerleriniń qudiretin, onyń tarıhı mıssııasyn jáne ıslam qundylyqtaryna adaldyǵyn kórsetedi. Tarıhı derekterge súıensek, Ámir Temir áskerin Ulytaýdyń «Altyn shoqysynyń» baýraıynda demalyp, osy joryqty eske alý úshin arnaıy eskertkish turǵyzýdy uıǵarady. Jaýyngerler tastardy jınap, sheberler oǵan jazý jazǵan.
Ermıtaj murajaıynda osy tańbaly taspen qatar temýrıdter dáýiriniń basqa da biregeı buıymdary saqtalǵan. Olardyń ishinde Ámir Temirdiń uly Mıranshahtyń aty jazylǵan hrızolıtten jasalǵan mór, Gavharshad Begimge tıesili nefrıt saqına jáne basqa da kóptegen tarıhı jádigerler bar.
Eske sala keteıik, olıgarhtardan tárkilengen artefaktiler Ulttyq mýzeıge berilmek.