Ámir Omarhanov kásibı jolynda alǵashqy tıtýlyna qol jetkizdi

ASTANA. KAZINFORM — Qazaqstandyq tennısshi, 18 jastaǵy Ámir Omarhanov Monastır (Týnıs) ITF M15 týrnırinde úzdik shyqty.

Dúnıejúzilik reıtıngide 1115-orynda turǵan Ámir Omarhanov fınalda álemniń 824-raketkasy, taǵy bir germanııalyq, 18 jastaǵy Maks Shonhaýspen kezdesti. 

Birinshi partııada Ámir 6:3 esebimen basym tústi. Ekinshisinde Shonhaýs dál sondaı eseppen ese qaıyrdy — 6:3.

Úshinshi, sheshýshi sette Á.Omarhanov jeńisti julyp aldy — 6:4.

Tartysty básekede Ámir sheshýshi sátterde tabandylyq tanytyp, tarazy basyn ózine aýdara bildi. 

Jasóspirimder arasynda álemniń 2-raketkasy M.Shonhaýs ótken aptada Týnıste ótken eresekterdiń ITF M25 jarysynda jeńimpaz atanǵan edi. 

Bul joly ol Omarhanovqa jol berdi.

Osylaısha, qazaqstandyq tennısshi eresekter arasynda kásibı jolynda alǵashqy tıtýlyna qol jetkizdi. 

Qaraǵandy tennıs mektebiniń túlegi Ámir Omarhanov bastapqyda belgili bapker Petr Nesterovtiń qolastynda jattyqty. Qazirgi kezde Rıkkardo Pıattı akademııasynda sheberligin jetildirip keledi.

Eske sala keteıik, budan buryn Ámir Omarhanovtyń Týnıstegi týrnırde bas júlde úshin talasatynyn jazǵan edik.