Ámir Omarhanov Astanada asa tartysty matchta qarsylasyn qapy qaldyrdy

ASTANA. KAZINFORM — Qazaqstandyq tennısshi, álemniń 1349-raketkasy, 16 jastaǵy Ámir Omarhanov Astanada ótip jatqan ITF M25 týrnıriniń shırek fınalyna shyqty.

Á.Omarhanovtyń ekinshi aınalymda álemniń 789-raketkasy, qytaılyq, 27 jastaǵy Van Aojanmen kezdesýi óte tartysty ótti. 

Tarazy basy birese qytaılyq, birese qazaqstandyq tennısshige aýyp otyrdy. 

Birinshi partııada esep 5:6 bolǵan mezette Ámir ózi dop bergende, 40:0 esebimen alda turyp, ese jiberip aldy — 5:7.

Esesine ekinshi sette Ámir qarymta qaıtara aldy — 6:4.

Sodan keıin sheshýshi partııada taı-breıkte matchty óz paıdasyna sheshti — 7:6 (7:1). Tartysty oıyn 2 saǵat 53 mınýtqa sozyldy. 

Qazaqstannyń jas juldyzy jartylaı fınalǵa shyǵý úshin álemniń 737-raketkasy, 28 jastaǵy úndistandyq Es De Pradjval Devpen talasady. 

Eske sala keteıik, budan buryn Sandýǵash Kenjebaevanyń Astana jarysynyń shırek fınalyna ótkenin jazǵan bolatynbyz.