Ámir Maımuratov sporttyq quzǵa órmeleýden úzdik úshtikke kirý úshin baq synaıdy
ASTANA. KAZINFORM – Sporttyq quzǵa órmeleýden «jyldamdyq» dıstsıplınasy boıynsha kelesi álem kýbogynyń kezeńi Krakovta (Polsha) ótedi. Bul týrnır jalpy eseptegi oryndardy anyqtaýda mańyzdy ról atqarady. Úzdik úshtikke kirý úshin qazaqstandyq Ámir Maımuratov ta baq synaıdy. Bul týraly Olympic.kz jazdy.
Qazir birneshe sportshy úzdik úshtikke kirýge úmitker retinde sanalady. Bıylǵy álem kýbogyndaǵy nátıje aıyrmashylyqtary básekeniń qyza túsýine sebep bolyp otyr. Indonezııa ókili Kıromal Katıbın reıtıngte kósh bastap keledi. Onyń qorjynynda 2380 upaı bar. Odan keıin AQSh sportshysy Samýel Ýotson ornalasqan – 2300 upaı. Ekeýi de bıyl birneshe kezeńde top jaryp, jalpy eseptegi jeńiske basty úmitkerlerdiń qataryna qosyldy.
Úzdik úshtikti qytaılyq Lýn Tszıango túıindep tur – 1925 upaı. Eger ol Krakovta jarysty merziminen buryn aıaqtasa, jalpy reıtıngte tómen túsýi múmkin. Oǵan birneshe sportshynyń jaqyndap qalýy yqtımal. Solardyń qatarynda bizdiń Ámir Maımuratov ta bar.
Bıylǵy maýsymda Olımpıada oıyndarynyń qatysýshysy ázirge jeńis tuǵyryna kóterile alǵan joq. Degenmen ol birtindep qarqyn alyp keledi. Jýyrda AQSh-tyń Denver qalasynda ótken álem kýbogynda Ámir altynshy nátıje kórsetti. Jalpy ol úsh kezeńge qatysty. Sonymen qatar onyń esebinde segizinshi jáne 11-oryndar da bar.
Ótken jyldyń sońynda Ámir Maımuratov Neomda (Frantsııa) ótken týrnırde jeńimpaz atanǵan bolatyn. Ol kezde Katıbın men Ýotsondy da basyp ozǵan edi. Sondyqtan onyń áleýetine kúmán keltirý qıyn. Budan bólek, Parıj Olımpıadasynda qazaqstandyq sportshy besinshi oryn alǵan edi, bul da onyń múmkindikterin kórsetedi.
Maýsym endi ortasyna taıap qaldy. Demek, Ámir dál osy kezeńde babyna kelip jatqan bolýy múmkin. Buǵan onyń AQSh-taǵy sońǵy álem kýbogynda kórsetken óneri dálel.
Jeńis tuǵyrynyń bıigine kóterilý qıyn bolmaq. Sebebi jalpy esepte joǵary oryndarǵa talasatyn sportshylar jeterlik. Munda qytaılyq Shýohýn Chý, japonııalyq Re Omasa, amerıkalyq Zak Hammer, sondaı-aq ýkraınalyqtar Grıgorıı Ilchıshın men ıAroslav Tkach bar. Krakovtaǵy kezeń tek júldeler úshin emes, jalpy esepte sheshýshi ról atqaratyn mańyzdy upaılardy da sarapqa salatyn tartysty doda bolǵaly tur.
Aıta keteıik, jalpy upaı kestesinde qazaqstandyqtar da bar: Beknur Altynbekov 613 upaımen 15-orynda, Damır Toqtarov 219 upaımen 37-orynda, Jandos Qalıbaı 93 upaımen 41-orynda, Álisher Murat 53 upaımen 51-orynda tur.
Áıelder arasynda Tamara Uljabaeva 446 upaımen 23-orynǵa jaıǵassa, Anna Ballarshına 175 upaı jınap, 37-orynǵa turaqtady.
Aıta keteıik, álem kýbogynyń kezeńi 5-6 shilde aralyǵynda ótedi.
Astanadaǵy jarysta búgin qazaqstandyq segiz boksshy sharshy alańǵa shyǵatynyn jazǵan edik.