Ámir Maımuratov quzǵa órmeleýden Seýldegi álem kýbogynda 2-oryn aldy
ASTANA. KAZINFORM – Qazaqstandyq sportshy Seýldegi týrnırde úzdikter qatarynan kórinip, kúmis júldeni enshiledi. Bul týraly kazclimbing Instagram paraqshasy habarlady.
Otandasymyz irikteý kezeńinde sátti óner kórsetip, 6-orynǵa taban tiredi. Osylaısha Ámir 1/8 fınalǵa joldama aldy. Ol alǵashqy aınalymda Taıland sportshysyn qapy qaldyrsa, 1/4 fınalda 2023 jylǵy jastar arasyndaǵy álem chempıony AQSh sportshysyn jeńdi.
Al, 1/2 fınalda álem chempıony Matteo Tsýrlonıden basym tústi. Sheshýshi synda Maımuratov Qytaıdan kelgen qarsylasyna ese jiberip, 2-orynǵa ıe boldy.
Qazaqstandyq sportshynyń atalǵan týrnırdegi eń úzdik kórsetkishi – 5,1 sekýnd.
Aıta keteıik, Ámir Maımuratov Parıjdegi tórtjyldyqtyń basty dodasynda quzǵa órmeleýden Olımpıada rekordyn jańartqan bolatyn.
