Ámir Maımuratov Azııa Olımpıadalyq keńesi Sportshylar komıssııasynyń múshesi bolyp saılandy
ASTANA. KAZINFORM - Qazaqstandyq sporttyq quzǵa órmeleýshi Ámir Maımuratov Aıchı-Nagoıa-2026 XX jazǵy Azııa oıyndary aıasynda ótken daýys berý qorytyndysy boıynsha Azııa Olımpıadalyq keńesi (AOK) Sportshylar komıssııasynyń quramyna kirdi.
Ulttyq olımpıada komıteti baspasóz qyzmetiniń habarlaýynsha, Ámir Maımuratov komıssııada Ortalyq Azııanyń atynan ókildik etedi. Bul orynǵa Iran sportshysy Arıan Salımı men Ózbekstan ókili Jasýrbek Jaısýnov ta úmitker boldy. Sondaı-aq Sportshylar komıssııasynyń quramyna Shyǵys Azııa atynan Naoto Tobe, Batys Azııa atynan Rıım ál-Sharshanı, al Ońtústik-Shyǵys Azııa atynan Tanıalak Chotfıbýnsın kirdi.
Ámir Maımuratov 2024 jyly Parıjde ótken Olımpıada oıyndaryna qatysyp, «jyldamdyq» dıstsıplınasynda besinshi orynǵa ıe boldy. Sondaı-aq onyń enshisinde Álem kýbogy kezeńderi men Azııa chempıonatyndaǵy júldeli oryndar bar. Daýys berý 20 qyrkúıek pen 2 qazan aralyǵynda ótti. Oǵan tek Aıchı-Nagoıa-2026 Azııa oıyndaryna qatysqan sportshylar ǵana daýys bere aldy. Ár sportshy ár aımaqtan bir úmitkerge daýys berýge quqyǵy boldy.
Aıta keteıik, AOK Sportshylar komıssııasy sportshylardyń múddesin qorǵap, olardyń uıym qabyldaıtyn sheshimderge qatysýyna múmkindik beredi. Komıssııa músheleri sportshylar men AOK basshylyǵy arasyndaǵy baılanysty qamtamasyz etip, jarystardy uıymdastyrý, dopıngke qarsy saıasat, medıtsınalyq kómek jáne logıstıka máselelerine qatysty atletterdiń pikirin jetkizedi.
Aıta keteıik, osyǵan deıin Ámir Maımuratov quzǵa órmeleýden Olımpıada rekordyn jańartqan bolatyn.
