AMÓZ bas dırektory jáne basqarma tóraǵasy taǵaıyndaldy

ATYRAÝ. QazAqparat - «Atyraý munaı óńdeý zaýyty» JShS (AMÓZ) jalpy jınalys ótkizdi, onda basqarma tóraǵasy men músheleriniń sandyq quramy, ókildik merzimi, saılaý jáne ókildikti merziminen buryn toqtatý týraly sheshim qabyldandy, dep habarlaıdy QazAqparat, atalmysh kompanııanyń baspasóz qyzmetine silteme jasap.

«AMÓZ» JShS Bas dırektory bolyp Ǵalymjan Amantýrlın taǵaıyndaldy. «AMÓZ» JShS basqarma quramy: Ǵalymjan Amantýrlın - basqarma tóraǵasy; Denıs Kozyrev - óndiris boıynsha bas dırektordyń orynbasary - bas ınjener, basqarma múshesi; Nurlan Keıkın - damý jáne jańǵyrtý boıynsha bas dırektordyń orynbasary, basqarma múshesi; Nurlan Sháńgereev - marketıng boıynsha bas dırektordyń orynbasary, basqarma múshesi; Ravıl Rafıkov - ekonomıka jáne qarjy jónindegi basqarýshy dırektor, basqarma múshesi; Rýslan Aısın - ákimshilik jáne baqylaý-quqyqtyq máseleler jónindegi basqarýshy dırektor, basqarma múshesi», - dep habarlady AMÓZ qoǵammen baılanys bólimi.

Zaýyttyń burynǵy bas dırektory Qaırat Orazbaev «QazMunaıGaz» ulttyq kompanııasy» AQ ortalyq apparatyna, Modernızatsııa departamentiniń dırektory laýazymyna aýysady jáne Qazaqstan Respýblıkasynyń úsh munaı óńdeý zaýytyn qaıta qurý úshin jaýapty bolady.