AMÓZ 40 myń tekshe metr gazdy fakelge ruqsatsyz jaqqan
ATYRAÝ. KAZINFORM – Atyraý munaı óńdeý zaýytynda byltyr jeltoqsan aıynda jáne bıyl qańtarda birneshe tehnologııalyq qondyrǵy isten shyǵyp, nátıjesinde fakel arqyly atmosferalyq aýaǵa 40 myń tekshe metr otyn gazy ekologııalyq ruqsatsyz shyǵarylǵan.
Atyraý oblysy boıynsha ekologııa departamentiniń málimetinshe, qorshaǵan ortaǵa S-12–S-19, S6–S10 gaz quramdas bólikteri, kómirsýtek fraktsııalary, kúkirtsýtek, benzol, tolýol, ksılol, etılbenzol, amılender, býtılen, etılen, ammıak jáne kómirtek oksıdi sekildi zattar taraǵan.
Sonymen qatar zaýytqa qarasty «Týhlaıa balka» alańyndaǵy sarqyndy sý 500 mm dıametrli qubyr arqyly ekologııalyq ruqsatsyz jerge tógilgeni anyqtaldy. Naqtyraq aıtqanda, aýmaǵy 5 gektar bolatyn birinshi ýchaskege shamamen 20 myń tekshe metr, al aýmaǵy 3 gektarǵa jýyq ekinshi aýmaqqa 23 myńnan astam tekshe metr las sý tógilgen.
Atalǵan zańbuzýshylyqtar Atyraý oblysy ekologııa departamenti júrgizgen jospardan tys tekseris barysynda belgili bolǵan. Departament basshysynyń aıtýynsha, kásiporyndaǵy ELTQ-AT-2 jáne ELTQ-AVT-3 qondyrǵylarynyń tehnologııalyq peshterinde ekologııalyq ruqsatta kózdelmegen gazdar jaǵylǵan.
– 2025 jyly da fakelde ruqsatsyz gaz jaǵý faktileri tirkelgen. Buzýshylyqtar turaqty túrde qaıtalanǵandyqtan, tıisti materıaldar sottyń qaraýyna joldandy. QR Ákimshilik quqyqbuzýshylyq týraly kodeksiniń 328, 324 jáne 327-baptaryna sáıkes, ákimshilik aıyppuldan bólek óndiris qyzmetin toqtata turý jazasy qarastyrylǵan. Qyzmetti toqtatý týraly sheshimdi tek sot qabyldaıdy, - dedi Atyraý oblysy boıynsha ekologııa departamentiniń basshysy Asqar Júsipov.
Eske salaıyq, 25 qańtar kúni turǵyndardyń narazylyǵynan keıin Qazgıdromet RMK Atyraý oblystyq fılıalynyń mamandary atmosferalyq aýanyń sapasyn ólsheý úshin synama alǵan.
Zertteý nátıjesinde kúkirtsýtek kontsentratsııasynyń shekti ruqsat etilgen mólsherden birneshe ese artyq ekeni anyqtalǵan edi. Atap aıtqanda, Atyraý qalasyna qarasty Tasqala aýylynda bul kórsetkish 17,5 ese, Tasqala aýylyna irgeles aýmaqta 15 ese, al Hımposelok aýdanynda 36,3 ese artyq tirkelgen.
Jýyqta Atyraý oblysynyń sanıtarııalyq-epıdemıologııalyq baqylaý departamenti tabıǵı resýrstar jáne tabıǵat paıdalanýdy retteý basqarmasynyń usynysy negizinde «Qalalyq jáne aýyldyq eldi mekenderdegi, ónerkásiptik uıymdar aýmaqtaryndaǵy atmosferalyq aýanyń gıgıenalyq normatıvterin bekitý týraly» № QR DSM-70 buıryǵyna sáıkes kelmeýine baılanysty, Qazaqstan Respýblıkasynyń Ákimshilik quqyq buzýshylyq týraly kodeksiniń 425-baby, 1 bóligimen 1600 AEK kóleminde aıyppul salǵan edi.
Buǵan deıin ótken jyly óńirde 7 640 ekologııalyq quqyq buzýshylyq anyqtalǵanyn jazǵan edik.
