Amnesty International Trampty adam quqyqtary salasyndaǵy daǵdarysqa kinálady

ASTANA. KAZINFORM – Amnesty International adam quqyqtarynyń jahandyq daǵdarysy týraly eskertti. Uıym bul jaǵdaıdy «Tramp áserimen» baılanystyryp, destrýktıvti úrdisterdiń qarqyn alǵanyn málimdedi.

Halyqaralyq uıymnyń «Álemdegi adam quqyqtarynyń jaı-kúıi» atty jyl saıynǵy baıandamasynda AQSh prezıdenti Donald Tramptyń ákimshiligi júrgizip otyrǵan quqyqqa qarsy saıası naýqan adam quqyqtaryn qorǵaýdyń halyqaralyq tetikterine nuqsan keltirip, búkil álem boıynsha mıllıardtaǵan adamnyń ómirine qaýip tóndirip otyrǵany aıtylǵan.

Qujatta pikir bildirýshilerge qarsy aýqymdy repressııalar, qarýly qaqtyǵystardyń ýshyǵýy, klımattyq daǵdarysqa qarsy áreketterdiń jetkiliksizdigi, sondaı-aq mıgranttar, bosqyndar, áıelder, qyzdar men LGBT qaýymdastyqtarynyń quqyqtaryna qatysty keri reaktsııa artyp kele jatqany kórsetilgen. Uıym 2025 jyly bul salalarda jaǵdaı tipti qıyndaı túsýi múmkin ekenin eskertedi.

— Ekinshi prezıdenttik merziminiń júz kúninde Tramp adam quqyqtarynyń jalpyǵa ortaq qaǵıdattaryna múlde nemquraıly qaraıtynyn kórsetti. Onyń úkimeti AQSh pen halyqaralyq deńgeıde adamzattyń qaýipsizdigi men ádilettiligi úshin qurylǵan bastamalar men ınstıtýttarǵa tikeleı soqqy berýde. Kópjaqtylyq, bosqyndar quqyǵy, násildik jáne genderlik teńdik, jahandyq densaýlyq saqtaý men klımattyń ózgerýine qarsy sharalar sııaqty uǵymdarǵa qarsy ashyq shabýyl ózge de elderdegi adam quqyqtaryn joqqa shyǵaratyn kóshbasshylar men qozǵalystarǵa dem berip otyr, — delingen Amnesty International málimdemesinde.

Buǵan deıin Ilon Mask USAID jáne Demokratııany qoldaý ulttyq qoryna bólinetin shyǵyndardy qysqartýdy usynǵan. Onyń aıtýynsha, Tramp bıligi tusynda AQSh ózge elderdiń ishki isine aralasýǵa onsha qulyqty emes.