Qazaqstan men Iordanııanyń yntymaqtastyq tarıhy fotokórmege arqaý boldy
ASTANA. KAZINFORM — Iordanııa astanasynda Qazaqstan men Iordanııa arasyndaǵy dıplomatııalyq qatynastardyń qalyptasýy men damýyn baıandaıtyn tarıhı-fotokórme ashyldy. Ekspozıtsııaǵa arhıvtik sýretter, tarıhı qujattar men dıplomatııalyq kezdesýlerden este qalǵan sátter qoıyldy.
Iordanııa astanasynda «Qazaqstan Respýblıkasy jáne Iordanııa Hashımıt Koroldigi: yntymaqtastyq tarıhy» atty tarıhı-qujattyq fotokórmeniń ashylý rásimi ótti.
Іs-sharany Qazaqstannyń Iordanııadaǵy elshiligi Iordanııa Mádenıet mınıstrligi men Ammandaǵy Koroldik mádenıet ortalyǵynyń qoldaýymen uıymdastyrdy.
Kórmege eki memleket arasyndaǵy 30 jyldan astam yntymaqtastyqtyń negizgi kezeńderin qamtıtyn 52 fotosýret pen arhıvtik qujat qoıyldy. Onda 1993 jyly dıplomatııalyq qatynastar ornaǵan kezden bastap búginge deıingi saıası, ekonomıkalyq jáne mádenı baılanystar kórinis tapqan.
Kórmeniń ashylý saltanatyn Qazaqstannyń Iordanııadaǵy elshisi Talǵat Shaldanbaı men koroldiktiń Mádenıet mınıstri Mustafa ar-Raýashde ótkizdi.
Saltanatty sharaǵa memlekettik mekemelerdiń ókilderi, dıplomatııalyq korpýs músheleri, mádenıet qaıratkerleri jáne Qazaqstan dıasporasynyń ókilderi qatysty.
Jıynda sóz sóılegen qazaqstandyq dıplomat sońǵy onjyldyqtarda Astana men Amman ózara qurmetke, senimge jáne halyqaralyq máseleler boıynsha ortaq ustanymdarǵa negizdelgen berik áriptestik ornatqanyn atap ótti.
— Qazaqstan men Iordanııa arasyndaǵy qarym-qatynas dostyq sıpatta, turaqty ári dáıekti túrde damyp keledi. 1993 jyly dıplomatııalyq qatynastar ornaǵannan beri eki el ózara qurmetke, senimge jáne negizgi máseleler boıynsha uqsas ustanymdarǵa negizdelgen berik saıası dıalog qalyptastyrdy, — dedi Talǵat Shaldanbaı.
Elshi joǵary deńgeıdegi ekijaqty baılanystardyń jandana túskenine de toqtaldy. Atap aıtqanda, 2025 jylǵy aqpanda Qazaqstan Prezıdenti Qasym-Jomart Toqaevtyń Iordanııaǵa resmı sapary jáne Iordanııa koroli II Abdallanyń 2025 jáne 2026 jyldary Qazaqstanǵa jasaǵan jaýap saparlary mańyzdy kezeńder retinde ataldy.
Sondaı-aq dıplomat eki memlekettiń beıbitshilik, turaqtylyq jáne dinaralyq kelisim máselelerindegi ortaq ustanymdaryn atap ótip, Iordanııanyń Taıaý Shyǵystaǵy bitimgerlik kúsh-jigerine joǵary baǵa berdi.
Saltanatty rásimde ekijaqty qarym-qatynastardyń mádenı qyryna da erekshe nazar aýdaryldy. Iordanııa Mádenıet mınıstrliginiń bas hatshysy Nıdal ál-Ahmad kórmeni ortaq tarıhı jadyǵa úńilip, eki halyq arasyndaǵy ózara túsinistiktiń qalyptasý jolyn zerdeleýge múmkindik beretin bastama dep baǵalady.
— Bul kórme ortaq jadymyzǵa úńilip, elderimiz arasyndaǵy qarym-qatynas pen ózara túsinistiktiń tarıhyn saqtaýǵa múmkindik beredi. Ol dostyqqa, ózara qurmetke jáne birlesken yntymaqtastyqqa negizdelgen baılanystardyń tereńdigin kórsetedi, — dedi mınıstrlik ókili.
Iordanııanyń Mádenıet mınıstri Mustafa ar-Raýashde de kórmeniń eki memleket arasyndaǵy mádenı kópir retindegi mańyzyn joǵary baǵalap, mundaı bastamalar dostyq baılanystardy nyǵaıtyp, yntymaqtastyqty odan ári damytýǵa yqpal etetinin aıtty.
Iordanııa tarapy mádenı baılanystardy keńeıtýge, sonyń ishinde materıaldyq emes murany saqtaýǵa, ony qujattaý úshin zamanaýı tehnologııalar men jasandy ıntellektini qoldanýǵa, ádebı shyǵarmalardy aýdarýǵa jáne birlesken mádenı is-sharalar ótkizýge qyzyǵýshylyq bildirdi.
Resmı rásimnen keıin qonaqtar eki el arasyndaǵy dıplomatııalyq qatynastar tarıhyn ár jyldardaǵy fotosýretter men qujattar arqyly tanystyratyn kórmeni tamashalady.
Іs-shara sońynda qonaqtarǵa qazaqtyń ulttyq taǵamdary usynylyp, olar Qazaqstannyń mádenıeti men dástúrlerimen jaqynyraq tanysýǵa múmkindik aldy.
Eske salaıyq, osy aıdyń basynda Iordanııa koroli II Abdalla ben ál-Hýseın Memleket basshysy Qasym-Jomart Toqaevtyń shaqyrýymen Qazaqstanǵa resmı saparmen kelgen edi.