Ámirjan Qosanovtyń shtaby Nur-Sultan jáne Semeıdegi saılaýshylarmen kezdesti

NUR-SULTAN. QazAqparat - QR Prezıdenttigine kandıdat Ámirjan Qosanovtyń saılaýaldy shtaby Nur-Sultan qalasynyń turǵyndarymen belsendi úgit-nasıhat jumysyn júrgizýdi jalǵastyrýda.

Bul týraly kandıdattyń saılaýaldy shtabynan habarlady.

«19 mamyrda Ámirjan Qosanovtyń saılaýaldy shtabynyń músheleri Nur-Sultan qalasynda úgit-nasıhat jumystaryn jalǵastyrdy. Tilendıev kóshesindegi turǵyn úılerdi aralap, «Sálem» bazarynda úgit-nasıhat materıaldaryn taratty. Turǵyndar kandıdattyń saılaýaldy tuǵyrnamasynyń baǵyttarymen tanysyp, halyqtyń áleýmettik máselelerin sheshý boıynsha óz usynystaryn bildirdi», - delingen habarlamada.

Sondaı-aq Ámirjan Qosanovtyń Semeıdegi saılaýaldy shtaby da turǵyndarmen belsendi jumys júrgizýdi bastady. 19 mamyrda oblystyq shtab qalalyq mádenıet úıinde halyqpen kezdesý uıymdastyrdy. Bul aktsııany turǵyndar men qonaqtarǵa túsindirý jumystaryn júrgizgen 20-ǵa jýyq belsendi qoldady.

«Shtabtyń bir múshesi úmitkerdiń ómirbaıany jáne onyń ómir joly týraly sóz qozǵap, suraqtarǵa jaýap berdi. Naýqandyq toptyń taǵy bir ókili qatysýshylarǵa kandıdatttyń saılaýaldy tuǵyrnamasynyń negizgi baǵyttaryn tanystyrdy», delingen kandıdat saıtyndaǵy habarlamada.

Eske sala keteıik, QR Prezıdentiniń saılaýy 9 maýsym kúni ótedi. Saılaýǵa 7 kandıdat tirkeldi.