Ámirjan Qosanov: Tarıhqa qatysty tolǵaý búgin men bolashaq týraly áńgimege ulaspasa – tul
Ámirjan Qosanovtyń pikirinshe, kez kelgen ult órkenıettik damý kóshinen qalyp qoımaýy úshin tuǵyrly, strategııalyq turpattaǵy rýhanı máselelerdi tasada qaldyrmaýy tıis.
«Bizdiń búgingi bolmystyń bir paradoksy bar: áleýmettik-ekonomıkalyq problemalar erekshe ýshyǵyp turǵan kezde taza gýmanıtarlyq, rýhanı máselelerdi ózektendirý birtúrli orynsyz, retsiz sekildi kórinedi. Bıliktiń rýhanı salasyndaǵy keıbir bastamalaryna qoǵamnyń bir bóliginiń tarapynan sondaı skepsıs bar ekendigi ras. Biraq mundaı, tarıhı turǵydan alǵanda toǵysharlyq kózqaras - qateliktiń qateligi! Óıtkeni kez kelgen ult, halyq órkenıettik damý kóshinen qalyp qoımaýy úshin tuǵyrly, strategııalyq turpattaǵy rýhanı máselelerdi tasada qaldyrmaýy tıis. Ekonomıkalyq qıyndyqtar ýaqytsha sıpatqa ıe ári zaman aýanyna qaraı myń qubylyp turady. Al jalpyulttyq rýhanı múddeler men maqsattar - turaqty ári máńgi. Osy turǵydan alǵanda Prezıdent maqalasynyń oıyp alar óz orny bar», - dedi Ámirjan Qosanov.
Sarapshy kez kelgen el bolashaqqa baǵdar almas buryn ótken tarıhyn ulyqtaýy tıis ekendigin alǵa tartady. Al Elbasynyń maqalasy osy oraıdaǵy qazaq tarıhynyń jańa tolǵaýy bolyp otyr.
«Ulttyń túp-tamyry týraly sózdiń eki túrli mańyzy bar. Birinshiden, tarıhty bilý tek qana jeńister men jetistiktermen ǵana maqtaný emes, ol - ótken joldyń tar jol, taıǵaq tustarynan, qatelikteri men tragedııalarynan tıisti taǵylym alý. Ekinshiden, qol jetken jetistikterdi aıta otyryp, búgingi kún men bolashaqqa naqty jospar qurý. Bir sózben aıtqanda, tarıh týraly tolǵaý búgingi kún jáne bolashaq týraly áńgimege ulaspasa - tul bop qalmaq», - dedi Á.Qosanov.
Onyń aıtýynsha, maqala meılinshe naqtylanǵan, onda aıtylǵan ıdeıalardy tikeleı júzege asyrýdyń mehanızmderi men tásilderine deıin táptishtep jazylǵan. Endigi mindet - osy oılardy qatyp-semip qalǵan dogma retinde qabyldamaı, olardy shyǵarmashylyq turǵydan tereńdetip, damytý jáne daýryqpashylyq pen dabyrashyldyqqa salynbaı, júzege asyrý.
«Árıne, bul turǵydan alǵanda, tarıhshylar, basqa da gýmanıtarlyq salalar mamandaryna artar júk aýyrlaı túseri haq. Biraq, menińshe, maqalada aıtylǵan keshendi oılardy bir ǵana salaǵa telip qoıý ábestik bolar: bul protseske, bul qozǵalysqa barsha jurt, kúlli qoǵam atsalysýy kerek dep oılaımyn. Bálkim, naq osy tusta ártúrli saıası kózqarasy men ustanymy bar toptar men tulǵalar ortaq maqsat - ulttyq, memlekettik múdde tóńireginde uıysýy da qajet bolar. Sonymen birge, osy sekildi mańyzdy, tuǵyrnamalyq sıpaty bar gýmanıtarlyq bastamalar qarapaıym halyqty tolǵandyryp júrgen basqa da kókeıkesti máselelerden - kúndelikti turmys máselelerinen, eldiń áleýmettik-ekonomıkalyq, quqyqtyq-saıası damýynyń túıtkildi tustarynan tys qarastyrylmaýy tıis. Keshendi kózqaras, balama pikirler de eskeriler bolsa, Prezıdenttiń bul ıdeıasy meılinshe ómirsheń bolmaq», - dep qorytyndylady saıasatker.
