«Ámireden» Tóreǵalı sııaqty toı ánshisin jasamaımyn - prodıýser Jan Muqanov
ASTANA. QazAqparat - «Slavıan bazary» halyqaralyq óner festıvalinde 1 oryn alǵan Ernar Sadyrbaev Astanada baspasóz málıhatyn ótkizdi, dep habarlaıdy QazAqparat tilshisi.
Ánshiniń prodıýseri Jan Muqanovtyń aıtýynsha, jaqynda Ernar Sadyrbaev reseılik telearnanyń jańa shoýyna qatysýy múmkin.
«Bizge reseılik telearnalardan usynystar túsip jatyr. Atap aıtqanda, «Rossııa» telearnasynda jańa shoý ashylady. Uıymdastyrýshylar Ernardy sarapshy bolýǵa shaqyrdy. Biraq, sarapshy bolýdyń qyzyq emes ekenin kesip aıttym. 23 jastaǵy baladan qandaı sarapshy shyǵady? Odan da shoýdyń ózine qatystyraıyq dep usynys bildirdim», - dedi prodıýser Jan Muqanov.
Sondaı-aq, prodıýser ánshiniń bolashaqtaǵy obrazy jóninde baıandady.
«Aldaǵy ýaqytta Ernardyń qazaqstandyq ártisterge uqsamaıtyn erekshe jańa stılin qalyptastyramyz. Tóreǵalı sekildi toı ánshisin jasamaımyn (Buǵan deıin Jan Muqanov Tóreǵalı Tóreálige prodıýserlik etken - red.). Formaty da, obrazy da múldem basqa bolady. Búgin tańerteń qońyraý túsip, Ernardy úılený toıynda óner kórsetýge shaqyrdy. Birden bas tarttyq. Qazir bul mańyzdy emes. Shynynda da, qazaqstandyq ártis toılarda ǵana jaqsy tabys tabady. Al biz kontsertten qarajat tabýǵa tyrysamyz», - dep óz sózin túıindedi prodıýser.
Aıta keteıik, «Ámire» (Ernar Sadyrbaev) Belarýste ótken «Slavıan bazary» halyqaralyq óner festıvalinde júldeli 1 oryndy jeńip aldy. 2015 jyly bul baıqaýda qazaqstandyq Dımash Qudaıbergen bas júldeni ıelengen bolatyn.
Ernar Sadyrbaev áýeli Nurǵısa Tilendıevtiń «Qustar ánin» shyrqady. Ekinshi kúni orkestrdyń súıemeldeýimen Raıan Poýstyń «Podberı mýzyký» jáne Rokopera Motsarttyń «ıA splıý na rozah» atty shyǵarmalaryn oryndady.
Buǵan deıin ánshiniń prodıýseri Jan Muqanov baıqaýda bolǵan qyzyqty oqıǵalardy aıtyp bergen bolatyn.
Foto: weproject.kz
