«Ámire» fılminiń qazaq tilindegi treıleri shyqty

Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ jáne Álıdar Ótemuratovtyń «Dar Play» kompanııasymen birlese túsirgen «Ámire» fılminiń túsirý jumystary búgingi kúni tolyǵymen aıaqtalǵan. Kınotýyndynyń túsirý toby kartınanyń qazaq tilindegi treılerin jaryqqa shyǵaryp otyr.

Ámire Qashaýbaevtyń ómir jolyna arnalǵan  kórkem fılm 2018 jyly 5 sáýirde ulttyq prokatqa qazaq (orys tilinde sýbtıtrleri bar) jáne orys tilderinde (qazaq tilinde sýbtıtrleri bar) shyǵady.

«Halyqaralyq túsirilim tobynyń quramynda: amerıkalyq qoıýshy-rejısser Djef Vespa (Jeff Vespa), operator - Maksım Osadchıı («9 rota», «Stalıngrad») bar. Fılmniń stsenarııin jazǵan Benjamın A. van der Vın (Benjamin A. van der Veen). Basty rólderdi otandyq akterler Sanjar Mádıev (Ámire) jáne Erkebulan Daıyrov (Mustafa Shoqaı) somdaǵan. Sonymen qatar, brıtandyq akter Ben Aldrıdj (Ben Aldridge) jáne «Oblast tmy», «Trı bılborda na granıtse Ebbınga, Mıssýrı» fılmderi arqyly tanylǵan amerıkalyq aktrısa Ebbı Kornısh (Abbie Cornish) jáne basqa da akterler túsken», - dep habarlaıdy kınostýdııanyń baspasóz qyzmeti.

Kartınanyń bas prodıýseri, DAR kompanııasynyń negizin qalaýshy Álıdar Ótemuratov Ámiredeı erekshe daryn ıesi týraly kópshiliktiń bilgeni mańyzdy ekenin aıtady. 

«Biz zamandastarymyzǵa Ámire Qashaýbaevtyń qıyn ómir jolyn jáne fılmde shyrqalatyn onyń daýysyn estýge múmkindik bergimiz keledi. Ámireni jaqyn tanyp, ulttyq dástúrli ónermen etene tanysqan otandastarymyzdyń boıynda maqtanysh sezimi oıanady dep senemin. Óıtkeni, bizdiń mýzyka mádenıetin qalyptastyrǵan osyndaı adamdar, esimder bizdiń tarıhymyzda qalýǵa tıisti. Álem kınematografııasynda mýzyka dramasy janrynda túsirilgen fılmder kóp emes. Sondyqtan otandyq kórermenderge bul janrdaǵy kartınany kórip, ótken ǵasyrdyń 30-jyldaryna saıahat jasaý qyzyqty bolýǵa tıisti dep oılaımyn», - deıdi ol.